ગુજરાતના ધરતીપુત્રો ફરી ચિંતામાં મુકાયા! આ જિલ્લામાં DAP ખાતર બાદ હવે યુરિયા ખાતરની મોકાણ!

ગોવિંદ આહીર/જામ ખંભાળિયા: ચાલુ વર્ષે અવિરત વરસાદના કારણે ખેડૂતોને અનેક જાતની નુકસાની વેઠવાનો વારો આવ્યો હતો ત્યારે હાલ શિયાળુ પાક માટે જરૂરિયાત મુજબ નું યુરિયા ખાતર લેવા માટે ધરતીપુત્ર થઈ રહ્યા છે પરેશાન દ્વારકા જિલ્લાના મોટાભાગના સ્ટોરમાં ખાતર પૂરતા પ્રમાણ માં મળતું ન હોય ખેડૂતની મુશ્કેલીમાં ફરી એકવાર વધારો થયો હોય તેવો ઘાટ સર્જાયો હતો.

સરકાર તાત્કાલિક ખાતરનો સ્ટોક પૂરો પાડે તેવી માંગ
આ અંગે સરકારી સ્ટોર ની મુલાકાત લેતા તેમણે યુરિયા ખાતરને બદલે બીજા અન્ય ખાતર વાપરી શકાય તેવી ભલામણ કરી હતી પરંતુ શા માટે યુરિયા ખાતરનો પૂરતો સ્ટોક અહીં ઉપલબ્ધ નથી તે અંગે જણાવ્યું ન હતું ત્યારે હાલ ખાતરની મુશ્કેલી વચ્ચે ખેડૂતો એક દુકાને થી બીજી દુકાને ધક્કા ખાતા અને લાંબી લાંબી કતારો માં ઉભા રહેતા નજરે પડ્યા હતા અને સરકાર તાત્કાલિક ખાતરનો સ્ટોક પૂરો પાડે તેવી માંગ કરી હતી.

ખાતરની જરૂર ન હોય છતાં પણ લેવું પડે તેવી સ્થિતિ નિર્માણ
દ્વારકા જિલ્લામાં આ વખતે સારા વરસાદના કારણે કુવા બોરમાં પૂરતા પાણી છે ખેડૂતોને શિયાળુ પાક લેવા માટે ખાતરની ખાસ જરૂર હોય છે ત્યારે ખેડૂતો જણાવી રહ્યા છે કે હાલ શિયાળુ પાક લેવા માટે ખેતી તૈયાર કરી લીધી છે, પરંતુ ખાતર ન મળવાના કારણે રોજ શહેરમાં ધક્કા ખાવા પડે છે છતાં પણ યુરિયા ખાતર નથી મળતું તેની સામે અન્ય બીજા ખાતર મળે છે પરંતુ તે ખાતરની જરૂર ન હોય છતાં પણ લેવું પડે તેવી સ્થિતિ નિર્માણ થઈ છે.

દ્વારકા જિલ્લામાં કુલ 162000 હેકટર જમીનમાં શિયાળુ પાકનું વાવેતર
ત્યારે સરકાર વહેલી તકે યુરિયા ખાતરનો સ્ટોક પૂરતો ફાળવે તેવી માંગ ખેડૂતોમાં ઉઠી છે. દ્વારકા જિલ્લામાં કુલ 162000 હેકટર જમીનમાં શિયાળુ પાકનું વાવેતર થયું છે અને જેની જરૂરિયાત પ્રમાણે ખાતરનો જથ્થો ઉપલબ્ધ નથી થઈ રહ્યો જેના લીધે ખેડૂતો હેરાન થઈ રહ્યા છે.