નોકરી શોધવા ગોરખપુરથી આવ્યો હતો 17 વર્ષનો મોનુ, પિતાને પહેલો પગાર આપે તે પહેલા જ મળ્યું મોત

Rajkot Fire Tragedy : રાજકોટમાં હ્રદય કંપાવતી આગની ઘટનાથી ચારેતરફ અરેરાટી ફેલાઈ ગઈ છે. ગેમની આગમાં પરિવારોનું આક્રંદ સંભભાઈ રહ્યું છે. TRP ગેમઝોનમાંથી 28થી વધુ લાશો સિવિલ લવાઈ, ત્યારે માહોલ ડરામણો બન્યો હતો. ઈસ્ત્રીના કપડાંની જેમ પોટલી બને, તેમ લાશોને બાંધીને લાવવામાં આવી હતી. પરિજનો આંખોની અશ્રુધારા વચ્ચે રજિસ્ટરમાં પોતાના લોકોને શોધતા દેખાયા હતા. શનિવારની રાત જાણો કેવી રીતે પરિવારજનોએ રાત કાઢી, ખબર નથી કે સ્વજન જીવે છે કે નહીં. હજી પણ ડીએનએ આવશે ત્યારે જ ખબર પડશે. આ અગ્નિકાંડમાં અનેકોના જીવ ગયા. કોઈએ ભાઈ, તો કોઈએ દીકરી, કોઈએ બહેન તો કોઈએ સંતાનો ગુમાવ્યા છે. પરંતુ આ વચ્ચે ગેમઝોનમાં કામ કરતા કર્મચારીઓએ પણ જીવ ખોયો છે. અનેક કર્મચારીઓનો કોઈ અત્તોપત્તો નથી. તેમાં પણ 17 વર્ષના મોનુની લાપતા હોવાની કહાની તમને રડાવી દેશે. 

ગેમઝોનમાં કામ કરતો 17 વર્ષનો મોનુ લાપતા
રોજગારીની શોધમાં ગોરખપુરથી આવેલો 17 વર્ષનો કિશોર મોનુ ગોઢને જાણે મોત ખેંચી લાવ્યું હોય, તેમ 15 દિવસ પહેલા જ ગેમઝોનમાં નોકરી મળી હતી. પણ, તેને ક્યાં ખબર હતી કે, ગુજરાતમાં નોકરીની શોધ તેને મોત તરફ લઈ જશે. મોનુ તેના પિતરાઈ ભાઈ ગેમિંગ ઝોનના ફૂડ સ્ટોલમાં કામ કરવા લાગ્યો હતો. હજી તો તેનો પહેલો પગાર પણ આવ્યો ન હતો, તે પહેલા જ તે મોતને ભેટ્યો હતો. તેના સંબંધીઓ તેને શોધતા હોસ્પિટલ પહોંચ્યા હતા.