Gujarat Politics: ક્રિકેટર જાડેજાની પત્ની રિવાબા MLA બનતાં કોંગ્રેસે નયનાબાનું વધાર્યું કદ, 2024માં ભાભી Vs નણંદ

Naynaba Jadeja:  ટીમ ઈન્ડિયાની ઓલરાઉન્ડર ખેલાડી અને પ્રખ્યાત ક્રિકેટર રવિન્દ્ર જાડેજાની બહેન નયનાબા ફરી ચર્ચામાં છે. લોકસભાની ચૂંટણીને ધ્યાનમાં રાખીને કોંગ્રેસે સેવાદળના પ્રમુખ તરીકે નયનાબાને રાજકોટમાં મોટી જવાબદારી સોંપી છે. ગત વિધાનસભાની ચૂંટણીમાં નયનાબાએ તેમના ભાઈની પત્ની રીવાબા સામે પ્રચાર કર્યો હતો.

ક્રિકેટર રવિન્દ્ર જાડેજાના પત્ની રિવાબા જામનગરની ઉત્તર બેઠક પરથી ધારાસભ્ય બન્યા છે. તેઓ હાલમાં રાજકારણથી લઈને ક્રિકેટ અને ફિલ્મની દુનિયામાં સમાચારમાં ચમકી રહ્યાં છે, ત્યારે જાડેજાની મોટી બહેન નયનાબા ફરીથી હેડલાઇન્સમાં છે. નયના જાડેજાનું કદ વધારતા કોંગ્રેસ પક્ષે તેમને રાજકોટ શહેર અને જિલ્લા સેવાદળના વડા બનાવ્યા છે. નવી જવાબદારી મળતાં નયનાબાએ ફરી ગર્જના કરી અને કહ્યું કે તેઓ કોંગ્રેસ સંગઠનને મજબૂત કરવા સખત મહેનત કરશે. પોતાની ફેસબુક પોસ્ટમાં નયનાબાએ સેવાદળના મુખ્ય આયોજક લાલજી દેસાઈનો પણ આભાર માન્યો છે.

રીવાબા જાડેજા ચૂંટણી જીત્યા હતા
નયનાબાને મોટી જવાબદારી આપીને કોંગ્રેસે તેમનું કદ વધાર્યું છે. રાજકીય વર્તુળોમાં ચર્ચાઈ રહ્યું છે કે આગામી લોકસભાની ચૂંટણીમાં ફરી એકવાર ભાજપમાંથી ધારાસભ્ય બનેલા રીવાબા જાડેજા ભાજપ માટે પ્રચાર કરશે, જ્યારે તેમના નણંદ નયનાબા ફરી એકવાર કોંગ્રેસ માટે પ્રચાર કરશે. ગયા વર્ષે ડિસેમ્બરમાં યોજાયેલી ગુજરાત વિધાનસભાની ચૂંટણીમાં નણંદ અને ભાઈ-ભાભી વચ્ચે શબ્દોનું યુદ્ધ જોવા મળ્યું હતું, જોકે ક્રિકેટર રવિન્દ્ર જાડેજાની પત્ની રીવાબા એક મોટા માર્જિનથી ચૂંટણી જીતવામાં સફળ રહ્યાં હતાં.

નયનાબા કોંગ્રેસમાં સક્રિય છે
ક્રિકેટર રવિન્દ્ર જાડેજાની મોટી બહેન નયનાબા લાંબા સમયથી કોંગ્રેસ સાથે જોડાયેલા છે. તેઓ ભૂતકાળમાં પણ સંસ્થાના અનેક હોદ્દા પર જવાબદારી નિભાવી ચૂક્યા છે. હવે તેઓ જિલ્લા મહિલા પ્રમુખ રાજકોટ મહિલા સેવા દળની જવાબદારી સંભાળશે. તેઓ સૌરાષ્ટ્રના પાટનગર ગણાતા રાજકોટના રાજકારણમાં ખૂબ જ સક્રિય છે. 

કોંગ્રેસ સેવાદળના મુખ્ય સંગઠક લાલજી દેસાઈએ નયાબાને આ નવી જવાબદારી સોંપી છે. ગુજરાત પ્રદેશ મહિલા સેવા દળના વડા પ્રગતિ બેન આહિરે નિયુક્ત નયબાનું પુષ્પગુચ્છથી સ્વાગત કર્યું હતું. આ પછી નયનાબાએ જણાવ્યું હતું કે તેઓ સમગ્ર રાજકોટમાં સંગઠનને મજબૂત કરવા માટે કામ કરશે.