વિધાનસભાની વાતઃ ખેરાલુમાં આવખતે કયો ખેલાડી કરી શકે છે ખેલ? જાણો રાજકીય પક્ષોનું ગણિત

ઝી બ્યૂરો, અમદાવાદ: ગુજરાાતમાં મહેસાણા જિલ્લાની ખેરાલુ વિધાનસભા સીટ પર ઘણો દિલચશ્પ મુકાબલો થશે તેમ લાગી રહ્યું છે. તેનું કારણ  એ છે કે છેલ્લી વખતની હાર છતાં અપક્ષ ઉમેદવારે સારી રીતે ચૂંટણી લડી હતી. અહીંયા કોંગ્રેસના ઉમેદવારને ત્રીજું સ્થાન મળ્યું હતું. આ બેઠક પર આમ આદમી પાર્ટી પણ લડશે તેવું લાગી રહ્યું છે. કેમ કે અરવિંદ કેજરીવાલ, મનીષ સિસોદિયા અને ભગવંત માન ઉત્તર ગુજરાતની બેઠક પર પ્રચાર કરી ચૂક્યા છે. આ વખતની ચૂંટણીમાં ઉમેદવાર તરીકે ભાજપે સરદાર ચૌધરી, કોંગ્રેસે મુકેશ દેસાઈ અને આમ આદમી પાર્ટીએ દિનેશ ઠાકોરને મેદાનમાં ઉતાર્યા છે. જ્યારે આ ઉપરાંત જાણીતા ગાયક જિગ્નેશ કવિ રાજને કોઈ પાર્ટી તરફથી ટિકિટ ન મળતા તેમણે ખેરાલુ બેઠક પરથી આ વખતની ચૂંટણીમાં અપક્ષ ઉમેદવારી નોંધાવી છે. 

બેઠક પર મતદારો:
બેઠક પર ઠાકોર, ચૌધરી અને રાજપૂત સમાજનું વર્ચસ્વ જોવા મળે છે. ખેરાલુમાં ઠાકોર 62 હજાર 621, ક્ષત્રિય 26 હજાર, ચૌધરી 18 હજાર 329, દલિત 17 હજાર, પાટીદાર 11 હજાર. પ્રજાપતિ 9090, બ્રાહ્મણ 6000, રબારી 6604, રાવળ 6000., દેવીપૂજક 5000, દરજી 1900, બારોટ 1800, સુથાર 1800, મોદી 1100, શાહ 600 અને અન્ય 15000 મતદારો છે. અંદાજિત કુલ 1 લાખ 59 હજાર જેટલાં મતદારો ખેરાલુ બેઠક પર આવેલા છે.

2017નું પરિણામ:
વર્ષ 2017ની વિધાનસભાની ચૂંટણીમાં ખેરાલુ બેઠક પર ભાજપના ભરતસિંહ ડાભી જીત્યા હતા. તેમણે અપક્ષ ઉમેદવાર મુકેશભાઈ દેસાઈને 21 હજાર 415 મતથી હાર આપી હતી. ખેરાલુ સીટ પર કોંગ્રેસના ઉમેદવાર રામજીભાઈ ઠાકોર ત્રીજા નંબરે રહ્યા હતા. તેમને ચૂંટણીમાં 38,254 મત મળ્યા હતા. જ્યારે બીજેપીના ભરતસિંહ ડાભીને 59,847 મત મળ્યા હતા.

વિધાનસભા ચૂંટણીમાં ખેરાલુ બેઠકનો ટ્રેક રેકોર્ડ:
વર્ષ     વિજેતા ઉમેદવાર              પક્ષ
1962  નટવરલાલ પટેલ            કોંગ્રેસ
1967  વી વી પારેખ                     IND
1972  શંકરજી ઠાકોર              કોંગ્રેસ
1975  શંકરજી ઠાકોર              કોંગ્રેસ
1980  મોહન દેસાઇ                  જેએનપી
1985  શંકરજી ઠાકોર              IND
1990  શંકરજી ઠાકોર             JD
1995  શંકરજી ઠાકોર             કોંગ્રેસ
1998  શંકરજી ઠાકોર             કોંગ્રેસ    
2002  રમીલાબેન દેસાઇ               ભાજપ
2007  ભરતસિંહ ડાભી           ભાજપ
2012  ભરતસિંહ ડાભી           ભાજપ
2017  ભરતસિંહ ડાભી           ભાજપ
2019  અજમલજી ઠાકોર             ભાજપ
(પેટા ચૂંટણી)