ક્ષત્રિયોના વિરોધના જુવાળમાં પણ વન-વે જીતી ગયા રૂપાલા, રાજકોટે ખોબલે ભરીને મત આપ્યા

Gujarat Lok Sabha Chunav Result 2024 : ગુજરાતમાં ભાજપે જ્યાં 5 લાખ જીતથી જીતવાનો દાવો કર્યો હતો, ત્યાં ભાજપને ક્ષત્રિય આંદોલન નડી ગયું હતું. ક્ષત્રિયોનો વિરોધ ભાજપને મોટી અસર કરશે તેવો ડર હતો. પરંતું ક્ષત્રિયોના વિરોધ વચ્ચે રૂપાલા જીતી ગયા છે. એ પણ જંગી લીડથી. ક્ષત્રિયોના પ્રચંડ વિરોધ વચ્ચે રાજકોટથી ભાજપના પરસોત્તમ રૂપાલાની જંગી લીડથી જીત થઈ છે. રાજકોટ લોકસભા બેઠક પર ભાજપનો દબદબો જોવા મળ્યો. ક્ષત્રિય આંદોલન વચ્ચે રૂપાલાની રેકોર્ડ બ્રેક લીડ મેળવી છે. ભાજપ 4.50 લાખથી વધુ મતની લીડ સાથે જીત તરફ આગળ છે. તો આ બેઠક પર કોંગ્રેસના પરેશ ધાનાણીની હાર થઈ છે. 

રાજકોટના વિકાસને વેગ આપીશ - રૂપાલા 
રાજકોટ લોકસભા બેઠકના ભાજપના ઉમેદવાર પરસોત્તમ રૂપાલાએ જીત બાદ પત્રકાર પરિષદ યોજી હતી. રૂપાલાએ કહ્યું કે, તમામ મતદારોનો અંતઃ કરણથી આભાર માનું છું. તમામ કાર્યકર્તાઓનો આભાર માનું છું. સમગ્ર ચૂંટણી દરમિયાન જે પ્રકારે મતદારોએ મતદાન કરવા રુચિ દાખવી તેને વંદન. રાજકોટના વિકાસની કેડીને જે કંડારી તે મશાલને હું હાથમાં લઈશ. વિકાસને વેગ આપીશ. 

રૂપાલાના ક્ષત્રિય સમાજ પરના એક નિવેદનને કારણે ઉકળતા ચરુ જેવી સ્થિતિ હતી. આ આગ ફેલાય, તો રાજપૂત વોટબેંક ધરાવતા અન્ય રાજ્યો સુધી પણ પ્રસરે તેમ હતી. પરંતું વિરોધના જુવાળ વચ્ચે રાજકોટવાસીએ રૂપાલાને ખોબલે ભરીને મત આપ્યા હતા.