ડરથી કાંપતી PGની પીડિત યુવતીએ ફરિયાદમાં લખાવ્યું, હું દવા લઈને સૂઈ ગઈ હતી, તેથી...’

અમદાવાદ :અમદાવાદના ગર્લ્સ પીજીના કેસમાં યુવતીને અડપલા કરનાર આરોપી આખરે પકડાઈ ગયો છે. જે યુવતી સાથે આ બનાવ બન્યો હતો, તે યુવતી એટલી ગભરાઈ ગઈ હતી કે, શરૂઆતમાં તો તેણે ફરિયાદ કરવાની ના પાડી હતી. પરંતુ પોલીસે પીડિતાને સમજાવતા તેણે ફરિયાદ નોંધાવી હતી. જેના બાદ પોલીસ તપાસ અને પૂછપરછના આધારે આરોપી સુધી પહોચી શકી હતી. ત્યારે પીડિત યુવતીએ પોતાની ફરિયાદમાં શુ લખાવ્યું, તે જાણીએ.  

પીડિતાએ શું કહ્યું....
પીડિતાએ પોલીસ ફરિયાદમાં લખાવ્યું કે, ‘હું નવરંગપુરા વિસ્તારમાં આવેલા કમલનયન એપાર્ટમેન્ટમાં કાર્યરત સંસ્કાર પીજીમાં રહું છું. હું છેલ્લા એક મહિનાથી અહી પીજીમાં સફાઈનું કામ કરું છું. તા.14 જૂન, 2019ના રોજ મને શરદી, ખાંસી થઈ હોવાથી હું દવા લઈ સૂઈ ગઈ. રાત્રે પોણા એક વાગ્યાના સુમારે અમારા ફ્લેટમાં રહેતી છોકરીઓ પૈકી અદિતી, આર્યા અને મારિયાનાએ મને જગાડીને જણાવ્યું કે, તમારી પાસે કોઈ અજાણ્યો યુવક આવ્યો હતો. ત્યારબાદ તે અહીંથી ભાગી ગયો હતો. આ મામલે અમે તાત્કાલિક પીજીના માલિક સન્નીભાઈને બોલાવ્યા હતા. તેમણે આવીને ફ્લેટના હોલમાં લગાવેલા સીસીટીવી ફૂટેજ ચેક કર્યા હતા. તેમાં દેખાયું હતું કે, હું જ્યારે હોલમાં સૂઈ રહી હતી ત્યારે આશરે 12.45 વાગ્યાની આસપાસ એક અજાણ્યો શખ્સ અમારા ફ્લેટમાં આવ્યો હતો. તેણે એક હાથથી દરવાજો પકડ્યો હતો, અને બીજા હાથથી મારી સાથે શારીરિક અડપલાં કર્યાં હતા. આ બાદ હું ગભરાઈ ગઈ હતી. મને બધાએ ફરિયાદ કરવા કહ્યું હતું, પણ મને આ ઘટનામાં કંઈ થયુ ન હોવાથી મેં ફરિયાદ કરી ન હતી. બાદમાં મીડિયાને આ બાબતની જાણ થઈ હતી. તેથી હવે હું મારી સાથે બનેલી આ ઘટનાની ફરિયાદ નોંધાવુ છું.’

બપોરે આ સમાચાર પ્રકાશમાં આવ્યા બાદ મોડી રાત્રે પીજીમાં ઘૂસીને યુવતી સાથે શારીરિક અડપલા કરનાર યુવકને ગણતરીના કલાકોમાં અમદાવાદ પોલીસે પકડી પાડ્યો હતો. પીજીમાં યુવતીની છેડતી કરીને ભાગી જનાર ભાવિન શાહ નામનો યુવક ઓનલાઈન ફૂડ ડિલીવરી બોય નીકળ્યો હતો. ભાવિન શાહ મૂળ દહેગામનો વતની છે અને હાલમાં વર્ષોથી નરોડા વિસ્તારમાં રહે છે. તે તેની માતા સાથે આ વિસ્તારમાં રહે છે. પોલીસે તેને ચાંદખેડા વિસ્તારમાંથી ઝડપી લીધો હતો. તે અગાઉ બે વખત આ જ પીજીમાં પીઝા આપવા ગયો હતો. જ્યાં પણ પીજીવાળી છોકરીઓ રહે છે ત્યાં ગયો હોવાથી વિસ્તારથી પરિચિત હતો. તેથી તે આ પીજીની છોકરીઓથી બહુ જ સારી રીતે વાકેફ હતો. 

સમગ્ર ગુજરાતના લેટેસ્ટ સમાચાર, જુઓ LIVE TV :