વડોદરા ગેંગરેપમાં પોલીસે છુપાવી માહિતી, પહેલા કહ્યું હતું કે ગરબા રમવા નહોતી ગઈ, હવે નવું સામે આવ્યું

Vadodara News : નવરાત્રિના બીજા નોરતે વડોદરાની સગીરા પર દુષ્કર્મ કરનારા આખરે પકડાઈ ગયા છે. પાંચ આરોપીના કોર્ટમાંથી બે દિવસના રિમાન્ડ મેળવ્યા છે. ત્યારે નવરાત્રિમાં બનેલી આ હચમચાવી દેતી ઘટનામાં મોટા અપડેટ આવ્યા છે. વડોદરાના ભાયલીમાં સગીરા પર ગેંગરેપ કેસમાં મોટો ખુલાસો થયો છે. પોલીસે કોર્ટમાં રિમાન્ડ અરજીમાં ખુલાસો થયો કે, સગીર પીડિતા ગરબા રમવા ગઈ હતી. અગાઉ પીડિતા ગરબા રમવા નહોતી ગઈ તેવું જણાવાયું હતું. 

રિમાન્ડ અરજીમાં સામે આવ્યું કે, પીડિતા ન્યૂ અલકાપુરી વિસ્તારમાં આવેલ શિશુ ગરબામાં ગરબા રમવા ગઈ હતી. પીડિતા ચણિયાચોળી પહેરીને તેના મિત્ર સાથે મોપેડ પર બેસીને ભાયલી પહોચી હતી. ગરબા મેદાનમાં કાદવ કીચડ હોવાથી પીડિતા અને તેના મિત્રએ શાંત જગ્યાએ જઈને બેસવાનું નક્કી કર્યું હતું. અગાઉ જિલ્લા પોલીસ વડાએ ઘટના બાદ પીડિતા ગરબા રમવા ગઈ ન હોવાથી વાત કરી હતી. તેમજ પીડિતા નોર્મલ ડ્રેસમાં હોવાનું પણ કહ્યું હતું. પહેલાં કહ્યું હતું કે, ગેંગરેપને ગરબા સાથે કોઈ સંબંધ નથી, પરંતું રિમાન્ડ અરજીમાં પીડિતા ચણિયાચોળી પહેરી ગરબામાં ગઈ હોવાનો ઉલ્લેખ કરાયો છે. આમ, વડોદરા ગેંગરેપ કેસમાં પોલીસનાં બે વિરોધાભાસી નિવેદન સામે આવ્યા છે. 

વકીલોએ આરોપીઓનો કર્યો ટપલીદાવ
વકીલોએ કોર્ટમાં આરોપીઓ પર ટપલીદાવ કર્યો હતો. કોર્ટ રૂમમાંથી બહાર નીકળતા જ વકીલોએ ટપલીદાવ કર્યો હતો. આ ઘટનાથી વકીલોમાં ભયંકર આક્રોશ જોવા મળ્યો હતી. જેથી પોલીસ આરોપીઓને રક્ષણ આપી લઈ ગઈ હતી. આ ઘટનાથી પળવારમાં કોર્ટ પરિસરમાં દોડધામ મચી હતી. 

આરોપીના મકાન પર ફરશે બુલડોઝર
વડોદરા કોર્પોરેશન પણ ગેંગરેપના આરોપી સામે કડક એક્શન લેશે. ગેંગરેપના બે આરોપીના મકાન પર પાલિકા બુલડોઝર ફેરવશે. મન્ના અને મમતાજ ઉર્ફે આફતાબના ઘરે પાલિકાએ નોટિસ લગાવી. મકાન ગેરકાયદે હોવાની નોટિસ લગાવવામાં આવી. પાલિકાએ જવાબ આપવા માટે 3 દિવસનો સમય આપ્યો. મકાન કેમ ન તોડી પાડવામાં આવે તેની રજૂઆત કરવા માટે સમય આપવામાં આવ્યો. 

ભાયલી સગીરા સાથે દુષ્કર્મના પાંચેય આરોપીને મેડિકલ પરીક્ષણ માટે હોસ્પિટલ લઈ જવા હતા. એક આરોપીનું મેડિકલ પરીક્ષણ ફેલ થતાં આજે વહેલી સવારે મેડિકલ પરીક્ષણ કરાવાયું હતું. આરોપી મુન્ના બંજારાનું વહેલી સવારમાં મેડિકલ પરીક્ષણ કરાવાયું હતું. મોબાઈલ સહિત અનેક પુરાવા માટે વડોદરા ફાયર વિભાગની મદદ લેવામાં આવી. આરોપીઓએ મોબાઈલ તળાવમાં ફેંકી દેવાની પ્રાથમિક માહિતી તાલુકા પોસ્ટે આપી. ફાયરના અધિકારી દ્વારા બોટ સહિત ગેજેટ લઈને તપાસ કરાશે.