એમ.એસ. યુનિવર્સિટીના ઉર્દુ વિભાગના પ્રોફેસરે યુવતીને કરી છેડતી, ડિને આપ્યા તપાસના આદેશ

વડોદરાઃ મહારાજા સયાજીરાવ યુનિવર્સિટીમાં ઉર્દુ વિભાગના એક પ્રોફેસર દ્વારા આર્ટ્સના પ્રથમ વિષયમાં અભ્યાસ કરતી વિદ્યાર્થિની સાથે છેડતીનો મામલો સામે આવ્યો છે. યુનિવર્સિટીમાં આ કલંકરૂપ ઘટના બનતા ઉર્દુ વિભાગને તાળાં મારી દેવામાં આવ્યા છે. તો ઘટનાની તપાસ કરવા માટે ડીને વુમન્સ ગ્રીવયન્સ કમિટીને સૂચના આપી છે. આ કમિટીનો રિપોર્ટ આવ્યા બાદ યુનિવર્સિટી આગળની કાર્યવાહી હાથ ધરશે. 

આ ઘટનાની પ્રાપ્ત વિગત અનુસાર એમએસ યુનિવર્સિટીમાં ઉર્દુ વિભાગમાં ટેમ્પરરી પ્રોફેસર તરીકે ફરજ બનાવતા ડો. મહંમદ ઝુબેરે આર્ટ્સના પ્રથમ વર્ષમાં અભ્યાસ કરતી વિદ્યાર્થિનીની છેડતી કરી હતી. 

કમિટી કરશે તપાસ
આ ઘટના બન્યા બાદ આજે સવારે યુવતીએ ડિનને ફરિયાદ કરી હતી. ડિને પણ આ ફરિયાદને ગંભીરતાથી લેતા યુનિવર્સિટીમાં કાર્યરત વુમન્સ ગ્રીવયન્સ કમિટીને તપાસના આદેશ આપ્યા છે. આ કમિટી તપાસ કરીને પ્રોફેસર વિરુદ્ધ લાગેલા આરોપોનો રિપોર્ટ ડિનને પરત કરશે. 

કમિટીનો રિપોર્ટ આવ્યા બાદ આ પ્રોફેસર વિરુદ્ધ આગળની કાર્યવાહી કરવામાં આવશે. પરંતુ આ ઘટના સામે આવ્યા બાદ શિક્ષણ ક્ષેત્રમાં ખળભળાટ મચી ગયો છે. તો ઉર્દુ વિભાગને તાળાં પણ મારી દેવામાં આવ્યા છે. જો આ ઘટનામાં પ્રોફેસર દોષી હશે તો આગામી દિવસોમાં આ ઘટના ઉગ્ર સ્વરૂપ ધારણ કરે તેવું લાગી રહ્યું છે.