24 કલાકની અંદર સુરતમાં બીજી દારૂની પાર્ટી પકડાઈ, સ્ત્રી-પુરુષો માણી રહ્યા હતા મહેફિલ

સુરતમાં હજી ગઈકાલે જ દારૂની પાર્ટી કરતી માલેતુજાર પરિવારની 21 મહિલા પકડાઈ છે, ત્યાં 24 કલાકમાં ગાળામાં જ વધુ એક દારૂની મહેફિલ પકડાઈ છે. સુરતના અઠવાલાઈન્સ વિસ્તારમાં દારૂની પાર્ટી કરી રહેલા 8 પુરુષો અને 6 મહિલાઓની પોલીસે ધરપકડ કરી છે. 

સુરતના અઠવાલાઈન્સ વિસ્તારમાં પોલીસને બાતમી મળી હતી કે, અહીં સગરામપુરના સિલ્વર એપાર્ટમેન્ટમાં દારૂની મહેફિલ ચાલી રહી છે. ત્યારે પોલીસે રેડ પાડતા દારૂની મહેફિલ માણી રહેલી 6 મહિલા અને 8 પુરુષોની ધરપકડ કરાઈ હતી. અઠવાલાઈન્સ પોલીસે રેડમાં 5 દારૂની બોટલો સહિતનો મુદ્દામાલ જપ્ત કર્યો હતો. 

ઉલ્લેખનીય છે કે, ગઈકાલે રાત્રે સુરતના પીપલોદની ઓઈસ્ટર હોટલમાં ચાલતી રેવ પાર્ટીમાં પોલીસે દરોડો પાડી 21થી વધુ મહિલાઓને પકડી હતી. જન્મદિવસની પાર્ટીના નામે આ હોટલમાં શરાબ અને શબાબની પાર્ટી ચાલતી હોવાની માહિતી પોલીસને મળી હતી. અજાણી વ્યક્તિએ કરેલા કૉલના આધારે સુરતની ઉમરા પોલીસે હોટલમાં દરોડા પાડ્યા હતા.