સોલા સિવિલ RMO લાખોની લાંચ લેતા રંગે હાથ ઝડપાયા, કેન્ટીન કોન્ટ્રાક્ટરને પણ ન છોડ્યો

- વળ ખાય વાંદરુ ને માલ ખાય મદારી, કેન્ટિનનો કોન્ટ્રાક્ટ લેનાર પાસેથી માંગી લાંચ
- ત્રણ મહિના સુધી કોવિડ 19ની હોસ્પિટલમાં દર્દીઓને ભોજનનો મળ્યો હતો કોન્ટ્રાક્ટ
- બિલના નાણા પાસ કરાવવાની અવેજમાં બિલના 10 ટકા નાણા લાંચ પેટે માંગવામાં આવ્યા

મૌલિક ધામેચા/અમદાવાદ : સોલા સિવિલના RMO કેન્ટિન કોન્ટ્રાક્ટનું બિલ પાસ કરાવવા માટે લાંચ માંગતા રંગેહાથ ઝડપાયા હતા. ઘટના અંગે વિગતે મળતી માહિતી અનુસાર આ કામે હકીકત એવી છે કે, કોવિડ-૧૯ અંગે સોલા સિવિલ હોસ્પિટલમાં દાખલ થયેલા દર્દીઓ માટે પાણી તેમજ સોલા સિવિલ હોસ્પિટલ સ્ટાફને ચા-નાસ્તો, જમવાનું તેમજ પાણી પૂરૂ પાડવા માટે સોલા સિવિલ હોસ્પિટલ સુપ્રિટેન્ડન્ટ દ્વારા ઓર્ડર આપવામાં આવ્યા હતા. આ તમામ ઓર્ડર એક ખાનગી કોન્ટ્રાક્ટરને સોંપવામાં આવ્યો હતો. 

જો કે ચાર મહિના સુધી ઓર્ડર બાદ આખરે બિલ ચુકવવાનો વારો આવ્યો હતો. જેથી કેન્ટીન કોન્ટ્રાક્ટર દ્વારા તમામ બિલ આપવામાં આવ્યા હતા. આ ઓર્ડરના આધારે ફરીયાદી ભાઇ દ્વારા ચાર માસ સુધી કોવિડ-૧૯ અંગે  ચા પાણી  તથા  જમવાનું પૂરૂ પાડ્યું હતું. જો કે કેન્ટિન ફેસિલિટી બાબતે રજૂ કરેલ 1.18 કરોડ રૂપિયાનું બિલ રજુ કર્યું હતું. જો કે આ બિલ પાસ કરાવવા માટે સોલા સિવિલના મેડીકલ ઓફીસર (ઇન્ચાર્જ વહીવટી અધિકારી) અને ઉપેન્દ્ર ગોપાલભાઇ પટેલ (ઇન્ચાર્જ RMO) દ્વારા 8 લાખ રૂપિયાની લાંચની માંગ કરવામાં આવી હતી. 

બિલ મંજુર કરવા માટે પહેલા ૩૦% લેખે લાંચની માંગણી કરવામાં આવી હતી. જો કે રકઝકના અંતે ૧૬% લેખે 16 લાખની લાંચની માંગણી કરી હતી. જેમાં ફરીયાદી પાસેથી અગાઉ બે તબક્કે  10 લાખ રૂપિયાની લાંચ સ્વિકારી હતી. બાકીના 6 લાખ તથા ફરીયાદીના ભાઇની કેન્ટિનનું ટેન્ડર ત્રણ વર્ષ માટે મંજૂર કરવા બીજા બે લાખની લાંચ માંગી હતી. આમ કુલ 8 લાખની લાંચની માંગણી કરી હતી. જો કે લાંચની માંગણી કરનારા બંન્ને આરોપીઓએ એકબીજાની મદદથી ઉપેન્દ્ર પટેલે સોલા સિવિલ હોસ્પિટલ સુપ્રિટેન્ડન્ટ ઓફિસની સામે વેઈટીંગ રૂમમાં ફરીયાદી પાસેથી 8 લાખ રૂપિયાની માંગી સ્વીકારી હતી. બંન્ને આરોપીઓએ એકબીજાની મદદગારી કરી ગુનો કર્યો હતો. જો કે ACB દ્વારા બંન્નેને રંગેહાથ ઝડપી લેવામાં આવ્યા હતા.