ફરી એકવાર અમદાવાદમાં થઈ દુર્લભ બિમારીની સફળ સર્જરી, આ રોગમાં સ્નાયું ધીમેધીમે બને છે હાડકું

ઝી ન્યૂઝ/અમદાવાદ: ફરી એકવાર રાજ્યમાં દુર્લભ બીમારીની સફળ સર્જરી કરવામાં આવી રહી છે. અમદાવાદમાં ડૉ. યશ દેસાઈ દ્વારા મુકેશભાઈ નામના (નામ બદલેલ છે) દર્દીને છેલ્લા 4 વર્ષ પહેલા માથામાં હેમરેજ થતા ડાબા અંગની લકવાની તકલીફ થઇ હતી. ત્યારબાદ જે તે સમયે તેમને મગજના ભાગે ઓપેરેશન કરવામાં આવ્યું હતું અને 1 વર્ષ સુધી એની સારવાર ચાલી હતી.

તેમાં એમના પગના ભાગે લકવા રિકવરી આવી ગઈ હતી પણ વર્ષના અંતે પગના થાપાના એક સ્નાયુમાં ખુબ જ દુર્લભ બીમારી કે જેમાં સ્નાયુંમાં કેલ્શિયમ જમા થવાથી સ્નાયુ હાડકું બની જાય તેવી બીમારી થઇ હતી. એને તબીબી ભાષામાં હેટેરોટ્રોફિક ઓસિફિકૅન્સ ઓફ ઇલિયાકસ મસલ કહેવાય છે. સ્નાયુમાં થતી આ બિમારી લગભગ એક લાખમાં એક દર્દીને થાય છે.

આ તકલીફના લીધે દર્દી પોતાનો ડાબો પગ પુરો વળી શકતો નથી અને સામાન્ય રીતે બેસાય એ રીતે બેસી પણ શકતો નથી અને પગની હલન ચલનમાં પીડા પણ ખુબ જ થાય છે. તેમજ તેનું ઓપરેશન કરવું પણ ખુબ જોખમી છે. કેમ કે આ સ્નાયુની બાજુમાં જ પગની લોહી લઇ જતી મુખ્ય નળી તથા પગની હલન ચલન કરતી મુખ્ય ચેતા આવેલી હોય છે.

ડૉ.યશ દેસાઈ એ અમદાવાદના થાપા અને ઘૂંટણના સાંધાના નિષ્ણાત ઓર્થોપેડિક સર્જન છે. તેમના દ્વારા આ જટિલ ઓપરેશન ખુબ જ સફળતા પુર્વક પુરુ પાડવામાં આવ્યું હતું અને થાપાના ભાગમાં બનેલ 11 સે.મી. જેટલું મોટું સ્નાયુમાં બનેલું હાડકું ઓપરેશન કરી કાઢવામાં આવ્યું હતું.