વૃદ્ધે સાતમા માળથી મારી મોતની છલાંગ, નીચે ભરાયું લોહીનું ખાબોચિયું

રવિ અગ્રવાલ, વડોદરા : વડોદરા શહેરના માંજલપુર વિસ્તારમાં આવેલા લાલબાગ બ્રિજ પાસે સાત માળના સત્વ હાઇટ્સ એપાર્ટમેન્ટના બી ટાવરની સાતમાં માળની ગેલેરીમાંથી કૂદીને અજાણ્યા વૃદ્ધે આપઘાત કર્યો છે. ઘટનાની જાણ થતાં જ માંજલપુર પોલીસ ઘટના સ્થળે દોડી ગઇ છે અને આધેડની ઓળખની કાર્યવાહી હાથ ધરી છે. જોકે આધેડ આપઘાત પહેલા સવારે 6:31 કલાકે લિફ્ટમાં જતો CCTVમાં દેખાયો હતો.

આ ઘટનાની વિગતો જોઈએ તો વડોદરા શહેરના માંજલપુર વિસ્તારમાં આવેલા લાલબાગ બ્રિજ પાસે સત્વ હાઇટ્સ એપાર્ટમેન્ટના બી ટાવરમાં આપઘાત કરનાર આશરે 60 વર્ષનો વૃદ્ધ વહેલી સવારે 6:31 મિનીટે આધેડ એપાર્ટમેન્ટની લિફ્ટ તરફ જતો દેખાયો હતો અને ત્યારબાદ સાતમા માળે આવેલી બહારની ગેલેરીમાંથી આધેડે નીચે કૂદી ગયો હતો. આ ઘટના પછી માંજલપુર પોલીસે ઘટના સ્થળે પહોંચીને આધેડના પરિવારજનોની શોધખોળ હાથ ધરી હતી. અને મૃતદેહને પોસ્ટ મોર્ટમ માટે સયાજી હોસ્પિટલમાં મોકલી આપ્યો હતો. માંજલપુર પોલીસે આ મામલે ગુનો નોંધીને આગળની કાર્યવાહી હાથ ધરી છે.

મળતી માહિતી પ્રમાણે આત્મહત્યા કરનાર વૃદ્ધ સત્વ હાઇટ્સનો રહેવાસી નથી. આ વ્યક્તિ બહારથી આપઘાત કરવા માટે સત્વ હાઇટ્સમાં આવ્યો હતો. જેથી તેની ઓળખ થઇ નથી.