એ આઘા રહેજો..બસ આવી! ગોંડલમાં ST બસને બસ સ્ટેન્ડમાં જ મોટી દુર્ઘટના ટળી! અનેક લોકો માંડ માંડ બચ્યા

ઝી બ્યુરો/ગોંડલ: 'સલામત સવારી એસટી અમારી' આ સ્લોગનથી કંઈક ઉંઘી જ ઘટના ગોંડલ એસટી બસ સ્ટેન્ડમાં બન્યો છે. રાજકોટના ગોંડલમાં ST બસનો બસ સ્ટેન્ડમાં મોટી દુર્ઘટના ટળી હતી. આ ઘટનામાં બસની બ્રેક ફેઈલ થઈ જતા બસ પૂછપરછ બારી સુધી પહોંચી ગઈ હતી. આ અકસ્માતની ઘટનામાં એક વ્યક્તિ ઈજાગ્રસ્ત થયો છે. પ્લેટફોર્મ નંબર 8 પર બસ ઊભી રાખવાની હતી, પરંતુ બ્રેક ફેઈલ થઈ જતા પૂછપરછની બારી પાસે બસ અથડાઈ હતી. બનાવની જાણ થતાં બાદ એસટી વિભાગ દ્વારા તપાસ હાથ ધરાઈ છે.

આ ઘટનાની મળતી માહિતી પ્રમાણે, રાજકોટ રૂટની બસ ગોંડલ બસ સ્ટેશન પર આવી હતી અને પ્લેટફોર્મ નંબર 8 પર ઉભી રાખવાની હતી. પરંતુ બસ ચાલક બસને પ્લેટફોર્મ નંબર 8 પર લઇને આવે છે, પરંતુ ત્યાં બ્રેક લાગી ન હતી. જેના કારણે બસ સીધી પૂછપરછ બારી સુધી પહોંચી ગઇ હતી. અચાનક બસ અંદર સુધી આવી જતાં ત્યાં ઉભેલા મુસાફરોમાં અફરા-તફરીનો માહોલ ઉભો થયો હતો. 

આ ઘટનામાં એક યુવક ઇજાગ્રસ્ત થયો હતો. ઇજાગ્રસ્ત યુવકને 108 એમ્બ્યુલન્સ મારફતે ગોંડલ સિવિલ હોસ્પિટલમાં સારવાર અર્થે ખસેડવામાં આવ્યો હતો. જ્યાં વધુ સારવાર અર્થે રાજકોટ ખસેડવામાં આવ્યો છે. આ સમગ્ર બનાવ સીસીટીવીમાં કેદ થઇ ગયો હતો. જેમાં જોઇ શકાય છે કે, બસ સ્ટેશનમાં પ્રવેશ્યા બાદ બસ પ્લેટફોર્મ પર ઉભી રહેવાના બદલે પૂછપરછ બારી સુધી પહોંચી જાય છે.