વિદ્યાર્થીઓને શાળાઓએ અને શાળાઓને તંત્રએ હથેળીમાં ચાંદ દેખાડ્યો, હવે બધુ પડી ભાંગ્યુ

અતુલ તિવારી/અમદાવાદ : રાજ્યમાં ડિઝીટલ સ્કૂલ બને અને પેપરલેસ કામગીરી થાય જેથી પર્યાવરણને થતું નુકસાન બચાવી શકાય તે હેતુથી 5 વર્ષ પહેલાં શિક્ષણ વિભાગ દ્વારા એક ઠરાવ કરવામાં આવ્યો હતો. જે અંતર્ગત રાજ્યની તમામ ગ્રાન્ટેડ શાળાઓને વર્ષે 6 હજાર રૂપિયા ઈન્ટનેટ ખર્ચ પેટે ચુકવવાનુ નક્કી કરાયુ હતું. જો કે છેલ્લા 5 વર્ષથી નાણા ન ચુકવાતા ગ્રાન્ટેડ શાળાઓનું ભારણ વધ્યું છે.

પાંચ વર્ષ પહેલાં રાજ્ય સરકાર દ્વારા ગ્રાન્ટેડ શાળાઓમાં પેપરલેસ કામગીરી કરવા માટે ઠરાવ કરવામાં આવ્યો. આ ઠરાવમાં સરકારે એક શાળાદીઠ પેપરલેસ કામગીરી અને ઈન્ટરનેટ માટે બે માસે 1,000 રૂપિયા એટલે કે એક વર્ષના 6 હજાર રૂપિયા આપવાનું નક્કી કર્યુ હતું. આ પેપરલેસ કામગીરી થકી ઠરાવમાં સુચન કરવામાં આવ્યુ કે, વિદ્યાર્થીઓની ઓનલાઈન હાજરી ભરવી, ખેલ મહાકુંભ અને કલા મહાકુંભનું રજીસ્ટ્રેશન ઓનલાઇન કરવું, વિદ્યાર્થીનુ ઓનલાઈન માર્કિંગ કરવુ વગેરે કામગીરી થતી હતી.

રાજ્યમાં આવેલી 5 હજાર કરતા વધુ ગ્રાન્ટેડ શાળાઓએ શિક્ષણ વિભાગના ઠરાવ મુજબ કામ તો ચાલુ કરી દીધું. જો કે શિક્ષણ વિભાગ થકી નક્કી કરાયેલા એક વર્ષના 6 હજાર રૂપિયા 2018 લઈ 2022 સુધી એકપણ શાળીને નથી આપવામાં આવ્યા. જેને લઈ ગ્રાન્ટેડ શાળા ખર્ચનું વધારાનુ ભારણ છેલ્લા 4 વર્ષથી ભોગવવુ પડી રહ્યું છે. આચાર્ય મંડળ દ્વારા વહેલીતકે શાળાઓને ચૂકવવાની થતી રકમ ચૂકવવા સરકારને વિનંતી કરાઇ છે, જેથી ગ્રાન્ટેડ શાળાઓનો ખર્ચ સરભર થઇ શકે.