આ વખતે કેવું છે ચોમાસું? અમદાવાદ સહિત આખા દેશ માટે મહત્વના સમાચાર

અર્પણ કાયદાવાલા, અમદાવાદ : હાલમાં દેશમાં કોરોના વાયરસ (Coronavirus)ની સમસ્યા છે ત્યારે દેશ માટે સારા સમાચાર આવ્યા છે. દેશમાં આ વખતે ચોમાસું સામાન્ય રહેશે. ભારતીય હવામાન વિભાગે બુધવારે 2020 માટે ચોમાસા સાથે જોડાયેલી આગાહી જાહેર કરી છે જેમાં આ સીઝનમાં ચોમાસું સમાન્ય રહેશે તેમ કહેવાયું છે. આ વર્ષે 96થી 104 ટકા વરસાદ પડશે. 

દેશના અલગ-અલગ ભાગોમાં ચોમાસું અલગ-અલગ સમયે આવે છે અને પાછું જાય છે. જોકે સામાન્ય રીતે દરવર્ષે કેરળના દરિયાકાંઠે ચોમાસું 1લી જૂન સુધીમાં પહોંચી જતું હોય છે. એવામાં હવામાન વિભાગની આગાહી મુજબ, આ વર્ષે પણ કેરળના તટ પર 1લી જૂને ચોમાસાનું આગમન થઈ જશે.

ભારતમાં જૂનથી સપ્ટેમ્બર દરમિયાન ચોમાસાની સીઝન હોય છે. આ સંજોગોમાં સામાન્ય ચોમાસાની ભવિષ્યવાણી ખેડૂતો માટે એક સારા સમાચાર છે. દેશમાં મોટાભાગે આ દરમિયાન જ પાકની વાવણીની શરૂઆત થતી હોય છે. ત્યારે સમયસર ચોમાસું આવવાથી ખેડૂતોને આ વર્ષે સારો પાક થવાનો અંદાજ છે. હાલમાં જ્યારે લોકડાઉન છે ત્યારે 20મી એપ્રિલ બાદ સરકારે ખેતી અને તેની સાથે જોડાયેલા કાર્યોમાં છૂટ આપવાની ગાઈડલાઈન જાહેર કરી છે.