Rajasthan: રાજસ્થાનના લોકોને 100 યુનિટ વીજળી મળશે ફ્રી, મુખ્યમંત્રી ગેહલોતે કરી મોટી જાહેરાત

નવી દિલ્હીઃ Rajasthan News: રાજસ્થાનમાં આ વર્ષે વિધાનસભા ચૂંટણી યોજાવાની છે. તેવામાં દરેક રાજકીય પાર્ટીઓ પુરજોશ પ્રયાસમાં લાગેલી છે. આ વચ્ચે પ્રદેશના મુખ્યમંત્રી અશોક ગેહલોતે મોટી જાહેરાત કરી છે. મુખ્યમંત્રી ગેહલોતે રાજસ્થાનની જનતાને વીજળી દરોમાં મોટી રાહત આપી છે. મુખ્યમંત્રીએ જાહેરાત કરી છે કે વીજળી ગ્રાહકોને પહેલા 100 યુનિટ સુધી વીજળી ફ્રી મળશે. 

સીએમ ગેહલોતે કહ્યું કે મોંઘવારી રાહત શિબિરોનું નિરીક્ષણ કર્યા પછી અને લોકો સાથે વાત કર્યા પછી, એવો પ્રતિસાદ મળ્યો કે વીજળીના બિલમાં સ્લેબ મુજબની મુક્તિમાં થોડો ફેરફાર થવો જોઈએ. મે મહિનાના વીજળીના બિલમાં ફ્યુઅલ સરચાર્જને લઈને પણ જનતા પાસેથી પ્રતિસાદ મળ્યો હતો, જેના આધારે મોટો નિર્ણય લેવામાં આવ્યો છે.

ખાસ કરીને મધ્યમ વર્ગના લોકોને ધ્યાનમાં રાખીને દર મહિને 200 યુનિટ સુધી વીજળીનો વપરાશ કરતા ગ્રાહકોને પ્રથમ 100 યુનિટ વીજળી મફત મળશે, સાથે 200 યુનિટ સુધીના ફિક્સ ચાર્જ, ફ્યુઅલ સરચાર્જ અને અન્ય તમામ ચાર્જ માફ કરવામાં આવશે અને રાજ્ય સરકાર તેમને ચૂકવશે.