જિન્નાહ વિવાદ : હજારો વિદ્યાર્થીઓનો AMU સર્કલ પર જમાવડો, ઇન્ટરનેટ બંધ અને કલમ 144 લાગુ

નવી દિલ્હી : અલીગઢ મુસ્લિમ યુનિવર્સિટીમાં હાલમાં પાકિસ્તાનના સંસ્થાપક મોહમ્મદ અલી જિન્નાહની તસવીરને કારણે ઉભા થયેલા વિવાદને કારણે તણાવ ઉભો થયો છે. આ મામલામાં 4 મેના શુક્રવારના દિવસે જુમ્માની નમાજ પછી હજારો વિદ્યાર્થીઓ એએમયુ સર્કલ પાસે એકઠાં થઈ ગયા હતા. આ મામલે હંગામાનો અંદેશો આવતા જ પ્રશાસને અલીગઢમાં કલમ 144 લગાવી દીધી છે તેમજ પ્રશાસને 4 મેના બપોરે બે વાગ્યાથી શનિવાર સુધી ઇન્ટરનેટ સેવા બંધ કરવાનો નિર્ણય લીધો છે. આ વિશે ડીએમ ચંદ્રભુષણ સિંહે આદેશ જાહેર કર્યો છે. આ જિન્નાહ વિવાદની આગ બીજી યુનિવર્સિટીઓ સુધી પણ પહોંચી ગઈ છે. આ મામલે બનારસ હિંદુ વિશ્વવિદ્યાલય બહાર કેટલાક સંગઠનોએ પણ વિરોધ પ્રદર્શન કર્યું છે. 

આ વિવાદ પછી ડિસ્ટ્રિક્ટ મેજિસ્ટ્રેટ ઇ્ન્ટરનેટ બંધ કરવાનો આદેશ આપ્યો છે જેથી સોશિયલ મીડિયા મારફત સમર્થન કે વિરોધમાં મેસેજ, તસવીર કે વીડિયો વાઇરલ ન કરવામાં આવે. આ મામલાના વિરોધ પ્રદર્શન મામલે શુક્રવારે જુમ્માની નમાજ પછી હજારો વિદ્યાર્થીઓ એએમયુ સર્કલ પર જમા થઈ ગયા હતા. અનેક દિવસોથી ચાલી રહેલા વિવાદ મામલે મુખ્યપ્રધાન યોગી આદિત્યનાથે અલીગઢ પ્રશાસન પાસે આ ઘટનાનો રિપોર્ટ માગ્યો છે. 

જિન્નાહ વિવાદની આગ બનારસ હિંદુ યુનિવર્સિટી સુધી પણ પહોંચી ગઈ છે. અહીં કેટલાક સંગઠનોએ વિરોધ પ્રદર્શન કર્યું અને જિન્નાહના પુતળાંનું દહન કર્યું હતું.