Corona Latest Data: મહારાષ્ટ્રમાં કોરોનાએ તમામ રેકોર્ડ તોડ્યા, 30 હજારથી વધુ કેસ, 99 મૃત્યુ

મુંબઈઃ દેશમાં કોરોના મહામારી (Corona Virus) ફરી ડરાવી રહી છે. મહારાષ્ટ્રમાં સૌથી વધુ અસર જોવા મળી રહી છે. કોરોનાએ મહારાષ્ટ્ર અને તેની રાજધાની મુંબઈમાં તમામ રેકોર્ડ તોડી દીધા છે. રાજ્યના સ્વાસ્થ્ય વિભાગ દ્વારા જારી તાજા આંકડા પ્રમાણે છેલ્લા 24 કલાકમાં રાજ્યમાં 30535 નવા કેસ સામે આવ્યા છે. તો મુંબઈમાં તેની સંખ્યા 3779 છે. 

તમને જણાવી દઈએ કે મહામારીની શરૂઆતથી લઈને અત્યાર સુધી એક દિવસમાં સામે આવનાર કેસની સંખ્યામાં સર્વાધિક છે. કોરોનાના વધતા કેસને જોતા રાજ્યમાં અનેક પ્રકારના પ્રતિબંધો લગાવવામાં આવ્યા છે. પરંતુ કેસની સંખ્યામાં દરરોજ મોટો વધારો થઈ રહ્યો છે. 

મુંબઈની વાત કરીએ તો અહીં આજે 3779 કેસ સામે આવ્યા છે. આ સાથે દેશની આર્થિક રાજધાનીમાં કુલ સંક્રમિતોની સંખ્યા વધીને 3,62,675 થઈ ચુકી છે. આ મહામારીએ અહીં 11586 લોકોના જીવ લીધા છે. છેલ્લા 24 કલાકમાં 10 લોકોના મૃત્યુ થયા છે. 

મહારાષ્ટ્રમાં ગઈકાલના આંકડા પર નજર કરીએ તો રાજ્યમાં 27126 નવા કેસ સામે આવ્યા હતા. તો 92 લોકોના મૃત્યુ થયા હતા.