Corona Update: કોરોનાની અત્યંત ભયાનક સ્થિતિ, નવા કેસ અને મૃત્યુઆંકમાં જબરદસ્ત મોટો ઉછાળો, તમામ રેકોર્ડ ધ્વસ્ત

નવી દિલ્હી: કોરોના વાયરસ (Corona Virus) મહામારી દિન પ્રતિદિન વિકરાળ સ્વરૂપ ધારણ કરી રહી છે. છેલ્લા 24 કલાકમાં એટલા મોટા પાયે કોરોનાના કેસ નોંધાયા છે કે અત્યાર સુધીના તમામ રેકોર્ડ  ધ્વસ્ત કરી નાખ્યા છે. દેશમાં કોરોનાની ભયાનક સ્થિતિ જોવા મળી રહી છે. કેન્દ્રીય આરોગ્ય મંત્રાલયના જણાવ્યાં મુજબ છેલ્લા 24 કલાકમાં દેશમાં કોરોનાના 2.61 લાખ કરતા વધુ કેસ નોંધાયા છે. જ્યારે 1501 લોકોએ કોરોનાથી જીવ ગુમાવ્યા છે. 

24 કલાકમાં 2.61 લાખથી વધુ કેસ
કેન્દ્રીય આરોગ્ય મંત્રાલયના જણાવ્યાં મુજબ છેલ્લા 24 કલાકમાં દેશમાં કોરોના (Corona) ના 2,61,500 દર્દીઓ નોંધાયા છે. આ સાથે કુલ કેસની સંખ્યા 1,47,88,109 પર પહોંચી ગઈ છે. જેમાંથી 1,28,09,643 લોકો રિકવર થયા છે. જ્યારે 18,01,316 લોકો હજુ પણ સારવાર હેઠળ છે. એક જ દિવસમાં કોરોનાએ 1501 લોકોનો ભોગ લીધો છે. દેશમાં કોરોનાથી કુલ મૃત્યુનો આંકડો 1,77,150 પર પહોંચી ગયો છે. રસીકરણ અભિયાન હેઠળ અત્યાર સુધીમાં 12,26,22,590 લોકોને રસી આપવામાં આવી છે.