Viral: માસ્ક મુદ્દે પહેલા તો પોલીસ સાથે ગેરવર્તણૂક કરી, ધરપકડ થતા પતિ બોલ્યો-પત્નીએ મને ઉશ્કેર્યો

નવી દિલ્હી: દિલ્હીના દરિયાગંજ વિસ્તારમાં રવિવારે પોલીસ સાથે ગાળાગાળી અને ગેરવર્તણૂંક કરનારા એક કપલનો વીડિયો સોશિયલ મીડિયામાં ખુબ વાયરલ થઈ રહ્યો છે. દિલ્હી પોલીસે આ કપલની ધરપકડ કરી લીધી છે. હવે ધરપકડ બાદ મહિલનો પતિ પંકજ દત્તા દોષનો ટોપલો પત્નીના માથે ઢોળી રહ્યો છે. તેના કહેવા મુજબ પત્નીએ માસ્ક પહેરવા દીધુ નહી, બંને વચ્ચે માસ્કને લઈને ઝઘડો પણ થયો હતો. તેની સાથે ન હોઉ તો હંમેશા માસ્ક પહેરું છું, તે મને ગુસ્સો અપાવી રહી હતી. 

ધરપકડ બાદ આપ્યું આ નિવેદન
આરોપી પતિ પંકજ દત્તાનું કહેવું છે કે તેણે પોતે પત્નીને કારમાં માસ્ક પહેરવાનું કહ્યું હતું પરંતુ તે ન માની અને મને પણ પહેરવા દીધો નહીં. દરિયાગંજ પોલીસ સ્ટેશનની બહાર એક ચેનલના રિપોર્ટરે પંકજને પૂછ્યું કે તે પોલીસ સાથે ગેરવર્તણૂંક કેમ કરતો હતો ત્યારે તેનું કહેવું હતું કે વાઈફના કારણે થોડી મુશ્કેલી થઈ ગઈ હતી. તે ગુસ્સો કરાવી રહી હતી. પોલીસવાળા માટે અપશબ્દના ઉપયોગ પર તેણે કહ્યું કે તેણે નહીં વાઈફે કહ્યું હતું.