PM મોદીએ આખરે કેમ બદલી નાખવી પડી પોતાની ટીમ? તેની પાછળની રણનીતિ ખાસ સમજો

નવી દિલ્હી: પ્રધાનમંત્રી નરેન્દ્ર મોદીએ પોતાના મંત્રીમંડળનું અત્યાર સુધીનું સૌથી મોટું વિસ્તરણ કર્યું છે. બધા મળીને આ વખતે મંત્રીમંડળમાં નવા 36 નવા ચહેરા સામેલ થયા છે. 7 જૂના મંત્રીઓનું પ્રમોશન થયું છે. જ્યારે 12 મંત્રીઓના રાજીનામા પડ્યા છે. 

ધરખમ ફેરફાર પાછળ PM મોદીની રણનીતિ
સૌથી મોટા ખબર એ છે કે દેશના ચાર મોટા કદના મંત્રીઓના રાજીનામા પડ્યા. જેમાં આરોગ્યમંત્રી ડોક્ટર હર્ષવર્ધન, કાયદા અને આઈટી મંત્રી રવિશંકર પ્રસાદ, સૂચના અને પ્રસારણમંત્રી પ્રકાશ જાવડેકર અને શિક્ષણમંત્રી રમેશ પોખરિયાલ નિશંકના નામ સામેલ છે. એટલે કે પ્રધાનમંત્રી મોદીએ આ વખતે શિક્ષણ, આરોગ્ય, આઈટી અને સૂચના તથા પ્રસારણ જેવા મોટા મંત્રાલયોમાં ભારે ફેરફાર કર્યા છે. આથી આપણે આ મંત્રીમંડળના ફેરબદલનું સંપૂર્ણ વિશ્લેષણ કરીશું અને જાણીશું કે જે મંત્રીઓની છૂટ્ટી થઈ છે તેની પાછળનું કારણ શું છે? અને પોતાની ટીમમાં આટલા ધરખમ ફેરફાર કરવા પાછળ પીએમ મોદીની રણનીતિ શું છે. 

પ્રધાનમંત્રી નરેન્દ્ર મોદીના મંત્રીમંડળના વિસ્તરણનો કાર્યક્રમ 7 જુલાઈએ રાષ્ટ્રપતિ ભવનમાં થયો જે દરમિયાન કુલ 15 નેતાઓએ કેબનેટ મંત્રી તરીકેના શપથ લીધા જ્યારે 28 નેતાઓએ રાજ્યમંત્રીના શપથ લીધા. આ કાર્યક્રમ પહેલા પ્રધાનમંત્રી આવાસ પર એક બેઠક પણ થઈ જેમાં પ્રધાનમંત્રીએ પોતાની નવી ટીમના સભ્યો સાથે ચાય પે ચર્ચા કરી અને પછી આ તમામ સભ્યો રાષ્ટ્રપતિ ભવન રવાના થયા હ તા. ત્યારબાદ મંત્રીમંડળના વિસ્તરણની સમગ્ર પ્રક્રિયા પૂરી કરાઈ. એટલે કે શપથ ગ્રહણ સમારોહ થયો. 

મંત્રીમંડળ વિસ્તરણના હાઈલાઈટ્સ
- કુલ 43 મંત્રીઓએ મંત્રી પદના શપથ લીધા. જેમાંથી 36 નેતાઓ એવા છે જે પહેલા મંત્રીમંડળનો ભાગ નહતા, 7 નેતા એવા છે જેમનું પ્રમોશન થયું છે. એટલે કે એવા નેતા જે પહેલેથી સરકારમાં હતા પરંતુ હવે તેમની ભૂમિકા સરકારમાં વધી છે. 
- મંત્રીમંડળ વિસ્તરણ બાદ હવે સરકારમાં દલિત સમુદાયના રેકોર્ડ 12 મંત્રી થયા અને આ તમામ નેતા દેશના અલગ અલગ આઠ રાજ્યોમાંથી આવે છે. સૌથી મહત્વની વાત એ છે કે અનુસૂચિત જાતિમાંથી આવતા આ તમામ નેતા અલગ અલગ 12 સમુદાય સાથે સંબંધ ધરાવે છે. 
- આ ઉપરાંત નવા મંત્રીમંડળમાં હવે એસટી એટલે કે અનુસૂચિત જનજાતિના મંત્રીઓની સંખ્યા 8 થઈ ગઈ છે. જે અત્યાર સુધીની કોઈ પણ સરકારમાં સૌથી વધુ સંખ્યા છે. અહીં એ વાતનું પણ ધ્યાન રાખવામાં આવ્યું છે કે અનુસૂચિત જનજાતિમાંથી કોઈ પણ એક સમુદાયને ખાસ સ્થાન ન મળે. જે જોતા આદિવાસી સમુદાયની સાત પેટાજાતિઓના નેતાઓને સરકારમાં મંત્રી બનાવવામાં આવ્યા છે. 
- આ મંત્રીમંડળ વિસ્તરણની સાથે કોઈ સરકારમાં સૌથી વધુ ઓબીસી સમુદાયના મંત્રી હોવાનો રેકોર્ડ પણ બન્યો છે. હવે પ્રધાનમંત્રી મોદીની ટીમમાં કુલ 27 OBC સમુદાયથી મંત્રી હશે. આથી તમે આ સરકારને દેશની પહેલી OBC સરકાર પણ કહી શકો છો. જેમાં પ્રધાનમંત્રી પોતે OBC સમુદાયમાંથી આવે છે. 
- પ્રધાનમંત્રી મોદીની કેબિનેટમાં 5 મંત્રી પણ OBC સમુદાયના હશે. 
- આ ઉપરાંત કેન્દ્રીય મંત્રીમંડળમાં મહિલાઓની સંખ્યા હવે 11 થઈ ગઈ છે.