સપનાં મોંઘા થયા : આ દેશ ભારતીય મુસાફરો પાસે 1130 ડોલર લેશે પગ મૂકવાનો ટેક્સ, અમેરિકાનો છે પડોશી

મધ્ય અમેરિકન દેશ અલ સાલ્વાડોરે ભારતીય મુસાફરો પર $1000નો ટેક્સ વસૂલવાનો નિર્ણય કર્યો છે. આના પર $130નો વેટ પણ ચૂકવવો પડશે. ભારત ઉપરાંત આફ્રિકાના 57 દેશોના નાગરિકો માટે પણ આ જોગવાઈ કરવામાં આવી છે. સેન્ટ્રલ અમેરિકન દેશ અલ સાલ્વાડોરનું નામ થોડા વર્ષો પહેલાં ત્યારે ચર્ચામાં આવ્યું જ્યારે તેણે બિટકોઈન પર મોટો નિર્ણય લીધો. અલ સાલ્વાડોર બિટકોઈનને કાનૂની ટેન્ડર તરીકે સ્વીકારનાર પ્રથમ દેશ બન્યો. હવે આ દેશ ફરી એકવાર હેડલાઇન્સમાં છે. આ દેશ ભારત અને આફ્રિકાથી આવતા મુસાફરો પાસેથી 1000 ડૉલર એટલે કે લગભગ 83,240 રૂપિયાની ફી વસૂલે છે. VAT લાગુ કર્યા પછી આ રકમ 1130 ડોલર થાય છે. બ્લૂમબર્ગના એક રિપોર્ટમાં આ દાવો કરવામાં આવ્યો છે. તે કહે છે કે મોટી સંખ્યામાં લોકો અમેરિકામાં સ્થળાંતર કરવા માટે અલ સાલ્વાડોરનો ઉપયોગ કરે છે. જેને નિયંત્રિત કરવા માટે અલ સાલ્વાડોરે આ પગલું ભર્યું છે.

અલ સાલ્વાડોરની પોર્ટ ઓથોરિટીએ તેની વેબસાઈટ પર જાહેર કરેલા એક નિવેદનમાં જણાવ્યું છે કે ભારત અથવા આફ્રિકાના પાસપોર્ટ પર આવનારા લોકો પાસેથી ફી વસૂલવામાં આવશે. આ ફી ભારતના લોકો તેમજ આફ્રિકાના 50 થી વધુ દેશો પર લાગુ થશે. આ ફીમાંથી ઉભી થયેલી રકમ દેશના મોટા એરપોર્ટને સુધારવામાં ખર્ચવામાં આવશે. 

અલ સાલ્વાડોરના રાષ્ટ્રપતિ નાયબ બુકેલે આ અઠવાડિયે અમેરિકી સહાયક સચિવ બ્રાયન નિકોલ્સ સાથે મુલાકાત કરી. આમાં સ્થળાંતર અંગે પણ ચર્ચા કરવામાં આવી હતી.

ફી ક્યારે અમલમાં આવી?
યુએસ કસ્ટમ્સ અને બોર્ડર પેટ્રોલના જણાવ્યા અનુસાર, ગયા નાણાકીય વર્ષમાં 32 લાખ લોકો ગેરકાયદેસર રીતે યુએસમાં પ્રવેશવાનો પ્રયાસ કર્યો હતો. આફ્રિકા અને અન્ય ઘણા દેશોના વસાહતીઓ અમેરિકા જવા માટે મધ્ય અમેરિકાના દેશોનો ઉપયોગ કરે છે. હવે આ લોકોએ વેટ સહિત 1130 ડોલર ચૂકવવા પડશે.

નવી ફી 23 ઓક્ટોબરથી લાગુ થઈ ગઈ છે. એરલાઇન કંપનીઓએ દરરોજ આફ્રિકા અને ભારતના 57 દેશોમાંથી આવતા મુસાફરોની યાદી અધિકારીઓને આપવાની રહેશે. કોલંબિયાની એરલાઇન એવિયાન્કાએ આ પ્રક્રિયા શરૂ કરી છે.