કર્મચારી ભવિષ્ય નિધિ સંગઠન દ્વારા PFના વ્યાજદરમાં કરાયો વધારો, 6 કરોડ કર્મચારીને થશે ફાયદો

નવી દિલ્હીઃ નોકરી કરતા કર્મચારીઓ માટે સારા સમાચાર છે. એમ્પ્લોઈઝ પ્રોવિડન્ટ ફંડ ઓર્ગેનાઈઝેશન (EPFO) દ્વારા ગુરૂવારે પ્રોવિડન્ટ ફંડ પર આપવામાં આવતા વ્યાજદરમાં વધારાની જાહેરાત કરાઈ છે. વર્ષ 2018-19ની પીએફ ડિપોઝિટ પર ગત વર્ષના 8.55 ટકાની સામે 8.65 ટકા વ્યાજ આપવાની જાહેરાત કરાઈ છે. 

કામદાર મંત્રી સંતોષ ગંગવારે જણાવ્યું કે, આ સંસ્થા સાથે 6 કરોડથી વધુ કર્મચારીઓ જોડાયેલા છે અનેઈપીએફઓના કેન્દ્રીય બોર્ડ ઓફ ટ્રસ્ટી (CBT)ની બેઠકમાં ચાલુ નાણાકિય વર્ષ માટે વધુ વ્યાજ દર ચૂકવવાનો આ નિર્ણય સર્વાનુમતે લેવાયો હતો. 

પીટીઆઈએ જણાવ્યું કે, CBTની મંજૂરી બાદ આ પ્રસ્તાવને મંજૂરી માટે નાણા મંત્રાલયને મોકલવામાં આવે છે. નાણા મંત્રાલયની મંજૂરી મળી ગયા બાદ જ પીએફ ધરાવતા કર્મચારીઓને વધેલા વ્યાજદરનો લાભ મળે છે. 

વર્ષ 2017-18માં છેલ્લા પાંચ વર્ષમાં સૌથી ઓછો 8.55 ટકાનો વ્યાજદર ચૂકવવામાં આવ્યો હતો. આ અગાઉ 2016-17માં વ્યાજદર 8.65 ટકા હતા, જ્યારે 2015-16માં 8.80 ટકા હતા. વર્ષ 2013-14 અને 2014-15માં ઈપીએફઓ દ્વારા 8.75 ટકાનો વ્યાજદર ચૂકવવામાં આવ્યો હતો.