કલમ 370 હટાવવાનો વિરોધ કરી રહેલા ફારૂક અબ્દુલ્લાના બહેન-પુત્રીની અટકાયત

શ્રીનગર: જમ્મુ અને કાશ્મીરના પૂર્વ મુખ્યમંત્રી ફારૂક અબ્દુલ્લાના બહેન સુરૈયા અને પુત્રી સાફિયાને પોલીસે અટકાયતમાં લીધા છે. આ બંને કલમ 370 હટાવવા વિરુદ્ધના એક પ્રદર્શનમાં સામેલ થયા હતાં અને આ દરમિયાન તેમને અટકાયતમાં લેવામાં આવ્યાં. અત્રે જણાવવાનું કે જમ્મુ અને કાશ્મીરમાંથી કલમ 370 હટાવાયા બાદથી પૂર્વ મુખ્યમંત્રી  પિતા-પુત્ર નજરકેદ છે. 81 વર્ષના ફારૂક અબ્દુલ્લા શ્રીનગર સ્થિત પોતાના ઘરમાં નજરકેદ છે. જ્યારે ઉમર અબ્દુલ્લાને સ્ટેટ ગેસ્ટ હાઉસમાં રાખવામાં આવ્યાં છે. અત્રે જણાવવાનું કે તેઓ શ્રીનગરના લાલ ચોકમાં કેટલીક કાશ્મીરી મહિલાઓ સાથે પ્રદર્શન કરી રહ્યાં હતાં જેમની અટકાયત થઈ. 

થોડા દિવસ પહેલા જ નેશનલ કોન્ફરન્સના કેટલાક નેતાઓએ પૂર્વ મુખ્યમંત્રી અને એનસી અધ્યક્ષ ફારૂક અબ્દુલ્લાની મુલાકાત કરી હતી. એનસીના નેતાઓના 15 સભ્યોના પ્રતિનિધિમંડળે ફારૂક અબ્દુલ્લા સાથે તેમના શ્રીનગર સ્થિત નિવાસ સ્થાને જઈને મુલાકાત કરી હતી. તેમના પુત્ર ઉમર સાથે પણ મુલાકાત કરી હતી.