મુંબઈ: ફોર્ટ વિસ્તારની એક ઈમારતમાં ભીષણ આગ, જુઓ VIDEO
દક્ષિણ મુંબઈના ફોર્ટ વિસ્તારમાં શનિવારે વહેલી સવારે એક ઈમારતમાં ભીષણ આગ લાગી ગઈ છે. આગ એટલી વિકરાળ હતી કે ફાયરની 16 ગાડીઓ ઘટનાસ્થળે પહોંચી હતી.
મુંબઈ: દક્ષિણ મુંબઈના ફોર્ટ વિસ્તારમાં શનિવારે વહેલી સવારે એક ઈમારતમાં ભીષણ આગ લાગી ગઈ છે. આગ એટલી વિકરાળ છે કે ફાયરની 16 ગાડીઓ ઘટનાસ્થળે પહોંચી. મળતી માહિતી મુજબ આગને ઓલવવામાં ફાયરના 2 કર્મચારીઓ પણ દાઝી ગયા છે. અત્રે જણાવવાનું કે ગત એક અઠવાડિયામાં દક્ષિણ મુંબઈમાં આગ લાગવાની આ બીજી મોટી દુર્ઘટના છે.
કહેવાય છે કે આગ કોઠારી મેન્શન નામની 6 માળની ઈમારતમાં લાગી. આગથી બિલ્ડિંગનો અડધો ભાગ તૂટી પડ્યો છે. જો કે રાહતની વાત એ છે કે આટલી મોટી દુર્ઘટનામાં કોઈ જાનહાનિના અહેવાલ નથી. જે સમયે આગ લાગી તે સમયે ઈમારત ખાલી હતી. પટેલ ચેમ્બર્સની અંદર આ આગ લાગી હતી. ફાયરના અધિકારીઓના કહેવા મુજબ આગ પહેલા 3 લેવલની હતી પરંતુ વધીને 4થા લેવલની કરી દેવાઈ.
આગ કયા કારણસર લાગી તે હજુ જાણી શકાયું નથી. ટ્રાફિક હાલ રોકી દેવાયો છે. કહેવાય છે કે બીએમસીએ આ ઈમારતને પહેલેથી જ જોખમી ગણાવી દીધી હતી. આ અગાઉ ગત શુક્રવારે જ દક્ષિણ મુંબઈમાં આવકવેરા વિભાગના સિંધિયા હાઉસમાં ભીષણ આગ લાગી હતી. આ વિભાગની ઓફિસમાં નીરવ મોદી જેવા અનેક આર્થિક અપરાધીઓ સંલગ્ન કાયદાકીય દસ્તાવેજો રખાયા હતાં.