કૂતરાને ફરવાને લઈને થયો વિવાદ : બેંકના ગાર્ડે ધાબા પરથી 8 લોકો પર કર્યું ફાયરિંગ, સાળા-બનેવીનું મોત

Indore dog fight shooting: મધ્યપ્રદેશના ઈન્દોરમાં મોડી રાત્રે બંને પક્ષો વચ્ચે લોહિયાળ અથડામણ થઈ હતી. અહીં બેંકના સિક્યોરિટી ગાર્ડે લાયસન્સવાળી બંદૂકથી અંધાધૂંધ ફાયરિંગ કર્યું, જેમાં 2 લોકોના મોત થયા. આ સમયે 6 લોકો ગંભીર રીતે ઘાયલ થયા હતા. ઇજાગ્રસ્તોને સારવાર માટે ખાનગી હોસ્પિટલમાં દાખલ કરવામાં આવ્યા છે. મૃતદેહોનો કબજો લઈ પોસ્ટમોર્ટમ માટે મોકલી આપવામાં આવ્યો હતો. પોલીસે ગાર્ડની ધરપકડ કરી છે. બેવડી હત્યા બાદ શહેરમાં ભયનો માહોલ જોવા મળ્યો હતો.

મળતી માહિતી મુજબ, ખજરાણા પોલીસ સ્ટેશન વિસ્તારના કૃષ્ણ બાગ કોલોનીમાં મોડી રાત્રે બેંકના ગાર્ડે ગભરાટ મચાવી દીધો હતો. કૂતરાને ફરવા જવાની નજીવી બાબતે ગાર્ડનો પાડોશીઓ સાથે ઝઘડો થયો હતો.

વિવાદ વચ્ચે ગાર્ડે છત પર ગોળીબાર શરૂ કરી દીધો 
ગાર્ડે ટેરેસ પરથી રાહુલ, વિમલ અને તેના પરિવાર પર ગોળીબાર કર્યો હતો. જેમાં બંનેના મોત થયા હતા. મૃતક રાહુલ અને વિમલ સગા સાળો બનેવી છે. વિમલનું નિપાનિયામાં સલૂન છે. તેના લગ્ન 8 વર્ષ પહેલા રાહુલની બહેન આરતી સાથે થયા હતા. તેમને બે દીકરીઓ છે.

ઘટના અંગે એડિશનલ ડીસીપીએ શું કહ્યું?
એડિશનલ ડીસીપી અમરેન્દ્ર સિંહે જણાવ્યું કે કૂતરાને ફરવાને લઈને બંને પક્ષો વચ્ચે વિવાદ થયો હતો. જેમાં બેંક ગાર્ડે ગોળીબાર કર્યો હતો. 2 લોકોના મોત થયા છે, 6 લોકો ઘાયલ છે. આરોપીની ધરપકડ કરવામાં આવી છે. કેસની તપાસ ચાલી રહી છે. પોલીસે લાઇસન્સવાળી બંદૂક કબજે કરી હતી.