મની લૉન્ડ્રિંગ કેસમાં નવો ખુલાસો: સુકેશ ચંદ્રશેખર સાથે બોલિવુડ અભિનેત્રી જેકલીનનો ફોટો સામે આવતા ખળભળાટ

મુંબઈ: મની લૉન્ડ્રિંગ કેસમાં જેકલીન ફર્નાન્ડીઝનું નામ સામે આવતા ખળભળાટ મચ્યો છે. હવે આ મામલે એક મોટો પુરાવો સામે આવ્યો છે. જેકલીન ફર્નાન્ડીઝ અને સુકેશ ચંદ્રશેખરની વચ્ચે નિકટતાની વાત સામે આવી હતી. હવે એક એવી તસવીર સામે આવી છે જેમાં બંનેની વચ્ચે સારી બોન્ડિંગ જોવા મળી રહી છે. આ તસવીરો એ વાતની સાક્ષી માટે પુરતી છે કે કેવી રીતે સુકેશ ચંદ્રશેખરે જેકલીન ફર્નાન્ડિસને ફસાવીને તેની સાથે મિત્રતા કરી હતી.

તપાસ એજન્સીઓએ કબજે કરેલી તસવીર
આ તસવીર તપાસ એજન્સીઓના હાથ લાગી છે, જેમાં જેકલીન અને મહાઠગ સુકેશ ચંદ્રશેખર જોવા મળી રહ્યા છે. સૌથી ચોંકાવનારી વાત એ છે કે આ તસવીર તે સમયની છે જ્યારે સુકેશ વચગાળાના જામીન પર તિહાર જેલમાંથી બહાર આવ્યો હતો અને ત્યારબાદ તે ફ્લાઈટ દ્વારા ચેન્નાઈ પહોંચ્યો હતો. આ તસવીરો ચેન્નાઈની એક ફાઈવ સ્ટાર હોટલની છે.

તસવીરની વાત કરીએ તો સુકેશના હાથમાં તમે જે iPhone 12 Pro જુઓ છો તે વાસ્તવમાં તે ફોન હતો જેમાં ઇઝરાયલી સિમ કાર્ડનો ઉપયોગ કરીને 200 કરોડની રિકવરી કરવામાં આવી હતી. સૌથી ચોંકાવનારી વાત એ છે કે જામીન વખતે પણ સુકેશ આ જ મોબાઈલ ફોનનો ઉપયોગ કરતો હતો. તસવીરો એજન્સી માટે એટલા માટે પણ મહત્વની છે કારણ કે આ ફિલ્મમાં અભિનેત્રી જેકલીન સુકેશ સાથે સ્પષ્ટપણે જોઈ શકાય છે.

છેતરપીંડીથી જેકલીનને ફસાવી
તમને જણાવી દઈએ કે સુકેશે પોતાને ચેન્નાઈનો એક મોટો બિઝનેસમેન જણાવીને જેકલીન સાથે મિત્રતા કરી હતી અને ત્યારબાદ સુકેશે જેકલીનને કરોડોની મોંઘી ભેટ પણ આપી હતી. આ જ કારણ હતું કે જેકલીનને ED દ્વારા સમન્સ મોકલવામાં આવ્યું હતું અને તેને ED પૂછપરછમાં હાજરી આપતી વખતે તમામ ક્રેડિટ કાર્ડ ટ્રાન્ઝેક્શન વિગતો સાથે તેની બેંક વિગતો લાવવાનું કહેવામાં આવ્યું હતું.

અત્રે ઉલ્લેખનીય છે કે, ડિસેમ્બરના પહેલા સપ્તાહમાં જ ED દિલ્હીની કોર્ટમાં મની લોન્ડરિંગના આ મામલામાં એક ખૂબ જ મહત્વપૂર્ણ ચાર્જશીટ દાખલ કરવા જઈ રહી છે, જેમાં સુકેશ અને જેકલીનના કનેક્શનનો પણ સંપૂર્ણ ઉલ્લેખ કરવામાં આવ્યો છે. આ તસવીર એપ્રિલથી જૂન મહિનાની છે. જેમાં જેકલીન અને સુકેશ ચેન્નાઈમાં લગભગ 4 વખત મળ્યા હતા. એજન્સીના સૂત્રોના જણાવ્યા અનુસાર, સુકેશે આ બેઠકો માટે જેકલીન માટે ખાનગી જેટની પણ વ્યવસ્થા કરી હતી. આ દરમિયાન સુકેશ લગભગ દોઢ મહિના માટે વચગાળાના જામીન પર જેલમાંથી બહાર આવ્યો હતો.