સોશિયલ મીડિયામાં પાકિસ્તાનના દુષ્પ્રચારની હવા કાઢી રહ્યાં છે આ બે જાબાંઝ કાશ્મીરી ઓફિસર

નવી દિલ્હી: જમ્મુ અને કાશ્મીરમાંથી આર્ટિકલ 370 હટાવાયા બાદથી પાકિસ્તાન દુનિયાભરમાં ભારત વિરુદ્ધ દુષ્પ્રચાર કરવા માટે સોશિયલ મીડિયા પર ફેક ન્યૂઝનો સહારો લઈ રહ્યું છે. પાકિસ્તાન ફેક વીડિયો અને તસવીરો દ્વારા દુનિયાને ગેરમાર્ગે દોરવાની કોશિશ કરી રહ્યું છે પરંતુ ભારતે દર વખતે તેનો પર્દાફાશ કરીને જડબાતોડ જવાબ આપ્યો છે. પાકિસ્તાનના આ નાપાક પ્રોપેગેન્ડાને કચડવામાં જમ્મુ અને કાશ્મીરના બે ઓફિસરોએ જબરદસ્ત મોરચો સંભાળ્યો છે. 

જમ્મુ અને કાશ્મીરમાં પાકિસ્તાની આતંકીઓનો સતત સફાયો કરવામાં આગળ પડતી ભૂમિકા ભજવનારા અને શ્રીનગરમાં તહેનાત આઈપીએસ ઓફિસર ઈમ્તિયાઝ હુસેન પુરાવા અને તર્કોના આધારે સોશિયલ મીડિયા પર પાકિસ્તાની દુષ્પ્રચારની હવા કાઢી  રહ્યાં છે. ટ્વીટર પર ખુબ સક્રિય રહેતા ઈમ્તિયાઝ હુસેન પાકિસ્તાની ટ્રોલને પોતાના તીખા પલટવારથી માત આપી રહ્યાં છે. રવિવારે એસએસપી ઈમ્તિયાઝે એક પાકિસ્તાની ડાકૂના કાશ્મીરમાં ભારત વિરુદ્ધ લડવાની જાહેરાત પર જોરદાર જવાબ આપીને બોલતી બંધ કરી. 

એસએસપી ઈમ્તિયાઝ હુસેને લખ્યું કે પાકિસ્તાનના સિંધનો એક ડાકૂ કાશ્મીરમાં લડવા માંગે છે. જે રીતે અત્યાર સુધી જે લોકો કાશ્મીરમાં લડવા માટે આવ્યાં હતાં, તે નબળા ડાકૂ હતાં. પાકિસ્તાની સેના હંમેશાથી પોતાના કામ માટે આવા ડાકૂઓને આઉટ સોર્સ કરતી રહી છે. તેનું કામ ડાકૂ જેવું જ છે. આ ડાકૂના પણ એવા જ હાલ થશે જે પહેલાના ડાકૂઓના થયા છે.