રાજકીય પંડિતોએ હવે માનવું પડશે કે અંકગણિતથી આગળ પણ કેમિસ્ટ્રી હોય છેઃ નરેન્દ્ર મોદી

નવી દિલ્હીઃ લોકસભા ચૂંટણી 2019માં ભારતીય જનતા પાર્ટીને જો પ્રચંડ વિજય મળ્યો છે તેના પછી પદનામિત વડાપ્રધાન આજે 27 મે, સોમવારના રોજ પ્રથમ વખત પોતાના સંસદીય વિસ્તાર વારાણસી પહોંચી રહ્યા છે. અહીં તેઓ કાશીની પ્રજાનો 'આભાર' માનશે. મોદીની સાથે પાર્ટીના અધ્યક્ષ અમિત શાહ પણ રહેશે. મોદીને વારાણસીની જનતાએ ફરી એક વખત વિજયનો તાજ પહેરાવ્યો છે. વારાણસીમાં વડાપ્રધાન મોદીને કુલ 6,74,664 વોટ મળ્યા હતા. જેની સામે સપાના ઉમેદવાર શાલિની યાદવને 1,95,159 વોટ, જ્યારે કોંગ્રેસના અજય રાય ત્રીજા સ્થાને રહ્યા અને તેમને 1,52,548 વોટ મળ્યા હતા. નરેન્દ્ર મોદીએ પોતાના સંબોધનમાં જણાવ્યું કે, "વર્ક અને વર્કર જ્યારે ભેગા થાય છે ત્યારે વન્ડર બને છે. સરકાર આ વર્ક અને વર્કરને સંગઠિત કરવાનું ઉદ્દીપક છે. ત્યારે જ વન્ડર સર્જાય છે." આ ઉપરાંત તેમણે રાજકીય પંડિતો પર નિશાન સાધતા કહ્યું કે, "2014, 2017ની ઉત્તર પ્રદેશ વિધાનસભાની ચૂંટણી અને હવે 2019ના ચૂંટણી પરિણામે રાજકીય પંડિતોને પણ માથું ખંજવાળતા કરી દીધા છે. એ લોકોએ પણ હવે સ્વીકારવું પડશે કે અંકગણિતની આગળ પણ કેમિસ્ટ્રી હોય છે." વડાપ્રધાન મોદીએ લોકસભા ચૂંટણી 2019માં ભવ્ય વિજય બદલ કાશીના કાર્યકર્તાઓ, મતદારો, ઉત્તરપ્રદેશના મતદારોનો બે હાથ જોડીને આભાર માન્યો હતો. 

10.35 AM : વારાણસી પોલીસ લાઈનમાંથી પીએમ મોદીનો કાફલો નિકળ્યો. થોડીવારમાં જ પહોંચશે કાશી વિસ્વનાથ મંદિર. ભાજપના અધ્યક્ષ અમિત શાહ પણ છે સાથે. 

10.30 AM : પીએમ મોદીનો કાફલો બાબતપુર એરપોર્ટથી હેલિકોપ્ટર દ્વારા વારાણસી પહોંચ્યો હતો. અહીં ભાજપના નેતાઓને મળ્યા બાદ તેઓ મંદિર જવા રવાના થયા છે. 

10.25 AM : વડાપ્રધાનનું સ્વાગત કરવા માટે શહેરમાં જુદી-જુદી જગ્યાએ કલાકારોને બેસાડવામાં આવ્યા છે. જેઓ વડાપ્રધાનનો કાફલો પહોંચ્યા પછી પોતાની કૃતિ રજૂ કરશે.