પુલવામા હુમલો: NIAને મળ્યું અત્યંત મહત્વનું CCTV ફૂટેજ, `આ` કામ કરતો જોવા મળ્યો આતંકી આદિલ

નવી દિલ્હી: જમ્મુ અને કાશ્મીરના પુલવામામાં 14મી ફેબ્રુઆરીએ સીઆરપીએફના કાફલાની એક બસ પર આત્મઘાતી હુમલો થયો જેમાં 40 જવાનો શહીદ થયાં. આ હુમલાની તપાસ કરી રહેલી તપાસ એજન્સી એનઆઈએને મહત્વનો પુરાવો મળી આવ્યો છે. એનઆઈએના સૂત્રોના જણાવ્યાં મુજબ એજન્સી પાસે એક સીસીટીવી ફૂટેજ મળી આવ્યું છે. જેમાં આતંકી હુમલાને અંજામ આપનારો જૈશ એ મોહમ્મદનો આતંકી આદિલ અહેમદ ડાર ઈકો કાર ચલાવતો જોવા મળી રહ્યો છે. એનઆઈએને આ ફૂટેજ ઘટનાસ્થળેથી થોડે દૂર નેશનલ હાઈવે પરથી મળી આવ્યું છે. જેમાં આદિલ સ્પષ્ટપણે જોઈ શકાય છે. 

NIAએ સંભાવના વ્યક્ત કરી છે કે હુમલામાં ઉપયોગમાં લેવાયેલી ઈકો કાર 2010-11નું મોડલ હોઈ શકે છે. હુમલામાં માટે તેને ફરીથી કલર કરવામાં આવી હતી. હુમલા બાદ ઘટનાસ્થળે પહોંચેલી એનઆઈએને ત્યાંથી એક કેન પણ મળ્યું છે. જે મુજબ કેનમાં 30 કિગ્રા આરડીએક્સ રાખવામાં આવ્યું હતું. અત્રે જણાવવાનું કે એજન્સીને ઘટનાસ્થળેથી કારના શોક ઓબ્ઝોર્વર પણ મળ્યા હતાં. જેના દ્વારા ટીમ કારના નિર્માણનું વર્ષ જાણવાની કોશિશ કરી રહી છે.