દુનિયા બદલી, પરંતુ આપણી દોસ્તી નહીં... પુતિનને મળી બોલ્યા PM મોદી

નવી દિલ્હીઃ Modi-Putin Talks Update: રશિયાના રાષ્ટ્રપતિ વ્લાદિમીર પુતિન ભારત પહોંચ્યા છે. પ્રધાનમંત્રી નરેન્દ્ર મોદીએ હૈદરાબાદ હાઉસ ખાતે રશિયાના રાષ્ટ્રપતિ વ્લાદિમીર પુતિનનું સ્વાગત કર્યું હતું. બંને નેતાઓ 21મી વાર્ષિક ભારત-રશિયા સમિટમાં ભાગ લઈ રહ્યા છે. ભારત અને રશિયા વચ્ચે આ 21મી વાર્ષિક શિખર બેઠક છે. રશિયાના રાષ્ટ્રપતિ થોડા કલાકો માટે ભારતની મુલાકાતે છે. નરેન્દ્ર મોદીએ રશિયાના રાષ્ટ્રપતિ વ્લાદિમીર પુતિન સાથેની વાતચીત દરમિયાન કહ્યું કે અમે આર્થિક ક્ષેત્રે પણ અમારા સંબંધોને આગળ લઈ જવા માટે લાંબા ગાળાનું વિઝન અપનાવી રહ્યા છીએ.

પીએમ મોદીએ કહ્યુ કે, આપણે 2025 સુધી 30 બિલિયન ડોલર ટ્રેડ અને 50 બિલિયન ડોલરના રોકાણનું લક્ષ્ય રાખ્યુ છે. કોવિડના પડકાર છતાં ભારત અને રશિયા વચ્ચે દ્વિપક્ષીય સંબંધો અને સામરિક ભાગીદારીમાં કોઈ બદલાવ આવ્યો નથી. કોવિડ વિરુદ્ધ લડાઈમાં પણ બંને દેશો વચ્ચે સહયોગ રહ્યો છે. 

પીએમ મોદીએ કહ્યુ કે, 2021 આપણા દ્વિપક્ષીય સંબંધો માટે ખુબ મહત્વપૂર્ણ છે, આ વર્ષ વર્ષે આપણી 1971ની ટ્ટીટી ઓફ પીસ ફ્રેન્ડશિપ એન્ડ કોઓપરેશનના પાંચ દાયકા અને આપણી સંયુક્ત ભાગીદારીના બે દાયકા પૂરા થઈ રહ્યાં છે. આજે આપણી વચ્ચે વિવિધ સમજુતિથી તેમાં મદદ મળશે. મેક ઇન ઈન્ડિયા કાર્યક્રમ હેઠળ કોર ડેવલોપમેન્ટ અને કો પ્રોડક્શનથી આપણો રક્ષા સહયોગ વધુ મજબૂત થઈ રહ્યો છે. 

રશિયાના રાષ્ટ્રપતિ વ્લાદિમીર પુતિને કહ્યુ કે, મને ભારતનો પ્રવાસ કરીને ખુશી થઈ રહી છે. પાછલા વર્ષે બંને દેશો વચ્ચે ટ્રેડમાં 17 ટકાનો ઘટાડો થયો હતો, પરંતુ આ વર્ષના પ્રથમ 9 મહિનામાં ટ્રેડમાં 38 ટકાનો વધારો જોવા મળ્યો છે. 

આ દરમિયાન વ્લાદિમીર પુતિને પણ ભારતને વિશ્વાસુ મિત્ર ગણાવ્યું હતું. પુતિને કહ્યું કે અમે ભારતને એક મહાન શક્તિ, મિત્ર દેશ અને વિશ્વસનીય ભાગીદાર તરીકે જોઈએ છીએ. બંને દેશો વચ્ચેના સંબંધો વધુ મજબૂત થઈ રહ્યા છે અને હું ભવિષ્યની રાહ જોઈ રહ્યો છું. રશિયન રાષ્ટ્રપતિએ કહ્યું કે હાલમાં બંને દેશો વચ્ચે લગભગ $38 બિલિયનનો વેપાર છે. આ સિવાય સૈન્ય અને ટેક્નોલોજી ક્ષેત્રે પણ અમારી મોટી ભાગીદારી છે. એટલું જ નહીં, આ બેઠકમાં પુતિને આતંકવાદ વિરુદ્ધ યુદ્ધમાં ભારતનો પક્ષ લેવાની વાત પણ કરી હતી. અમે સ્વાભાવિક રીતે દરેક બાબતમાં ચિંતિત છીએ, એમ તેમણે કહ્યું. આમાંનો એક આતંકવાદ છે.

અફઘાનિસ્તાનના મુદ્દે પણ બોલ્યા પુતિન, કહ્યું- દરેક લડાઈમાં સાથે રહીશું
પુતિને કહ્યું કે ડ્રગની હેરાફેરી અને સંગઠિત અપરાધ સામે લડવું એ પણ આતંકવાદ સામેના યુદ્ધનો એક ભાગ છે. આ અંતર્ગત અમે અફઘાનિસ્તાનમાં ચાલી રહેલા વિકાસને લઈને પણ ચિંતિત છીએ. પીએમ નરેન્દ્ર મોદી અને પુતિનની મુલાકાત પહેલા સોમવારે જ બંને દેશોના સંરક્ષણ અને વિદેશ મંત્રીઓની મુલાકાત પણ થઈ હતી. અહીં રક્ષા મંત્રી રાજનાથ સિંહે રશિયન રક્ષા મંત્રી સાથે મુલાકાત દરમિયાન 5,000 કરોડ રૂપિયાના પ્રોજેક્ટ પર હસ્તાક્ષર કર્યા છે. આ પ્રોજેક્ટ હેઠળ યુપીના અમેઠીમાં 5 લાખથી વધુ એકે-203 રાઈફલ્સનું નિર્માણ થવાનું છે. આ દરમિયાન બંને દેશો વચ્ચે આગામી 10 વર્ષ માટે સંરક્ષણ કરાર પર પણ હસ્તાક્ષર કરવામાં આવ્યા છે.

પુતિને છેલ્લા બે વર્ષમાં ભારતની મુલાકાત લીધી નથી. તે કોરોના રોગચાળાને કારણે G-20 અને COP 26 જેવી કોન્ફરન્સમાં પણ ભાગ લઈ શક્યો ન હતો. કોવિડના કારણે તેમણે ચીનની મુલાકાત પણ મોકૂફ રાખી હતી. જોકે, આ વર્ષે તેઓ માત્ર અમેરિકી રાષ્ટ્રપતિને મળ્યા હતા. પુતિન 16 જૂને જીનીવા પહોંચ્યા હતા.