જમ્મુ-કાશ્મીરમાં Postpaid પોસ્ટપેડ મોબાઈલ સેવા શરૂ, ઈન્ટરનેટ માટે હજુ રાહ જોવી પડશે

શ્રીનગર: જમ્મુ અને કાશ્મીરમાં મોબાઈલ પોસ્ટપેડ સર્વિસ બહાલ કરી દેવામાં આવી છે. અત્રે જણાવવાનું કે 5 ઓગસ્ટના રોજ જમ્મુ અને કાશ્મીરને વિશેષ રાજ્યનો દરજ્જો આપતી કલમ 370 હટાવાયા બાદથી સુરક્ષા કારણોસર મોબાઈલ ફોન સેવાઓ અને ઈન્ટરનેટ સુવિધાઓ પર પ્રતિબંધ મૂકાયો હતો. આ સમયગાળા દરમિયાન જો કે જમ્મુ અને લદાખમાં મોબાઈલ ફોન સેવાઓ ઉપલબ્ધ હતી. પરંતુ કાશ્મીર ખીણમાં પાંચ ઓગસ્ટથી પ્રતિબંધ હતો. 

આ અગાઉ રવિવારે શ્રીનગરમાં મીડિયા સાથે વાત કરતા રાજ્ય સરકારના પ્રવક્તા રોહિત કંસલે કહ્યું હતું કે કાશ્મીર ખીણમાં સમગ્ર સ્થિતિમાં સુધાર બાદ સોમવારથી પોસ્ટ પેડ મોબાઈલ ફોન સેવાઓ બહાલ કરવાની મંજૂરીનો નિર્ણય લેવાયો છે. જો કે ઈન્ટરનેટ સુવિધાની બહાલી પર કોઈ અધિકૃત નિવેદન અપાયું નથી. કાશ્મીર ઘાટીમાં 5 ઓગસ્ટથી ઈન્ટરનેટ સેવાઓ પણ બંધ છે.