Presidential Election Vote Counting 2022: દ્રૌપદી મુર્મૂ અને યશવંત સિન્હામાંથી કોણ બનશે નવા રાષ્ટ્રપતિ? આજે આવશે પરિણામ

Presidential Election Vote Counting 2022: દેશમાં નવા રાષ્ટ્રપતિ માટે હાલમાં ચૂંટણી થઈ જેનું આજે પરિણામ આવશે. આજે સવારે 11 વાગ્યાથી સંસદ ભવનમાં મતગણતરી શરૂ થઈ ગઈ છે. આ ચૂંટણીમાં મત નાખવા માટે બનાવવામાં આવેલા ઈલેક્ટ્રોલર કોલેજના સભ્યોના મતનું કુલ મૂલ્ય 10,98,882 છે. દ્રૌપદી મૂર્મૂ અને યશવંત સિન્હામાંથી જે પણ ઉમેદવાર 5,49,442 મત મેળવશે તેઓ આ ચૂંટણી જીતી લેશે. નવા રાષ્ટ્રપતિને 25 જુલાઈના રોજ પદ અને ગોપનીયતાના શપથ લેવડાવવામાં આવશે. 

ભાજપે દિલ્હીમાં રોડશોની તૈયારી કરી
સૂત્રોના જણાવ્યાં મુજબ રાષ્ટ્રપતિ ચૂંટણીમાં દ્રૌપદી મુર્મૂની જીત નક્કી માનીને ભાજપે જોરદાર તૈયારી કરી છે. મતગણતરી પૂરી થયા બાદ આજે સાંજે 5.30 વાગે દિલ્હીના પંત માર્ગથી રાજપથ સુધી રોડશો કરવામાં આવશે. આ રોડશોને રાષ્ટ્રીય અધ્યક્ષ જે પી નડ્ડા અને દિલ્હીના પ્રદેશ અધ્યક્ષ આદેશ ગુપ્તા લીડ  કરશે. રોડ શોમાં પાર્ટીના અનેક સાંસદ, ધારાસભ્યો, અને પદાધિકારીઓ ભાગ લેશે. આ દરમિયાન ભારતમાતા જિંદાબાદના નારા પણ લગાવવામાં આવશે. 

ઓડિશાના પૈતૃક ગામમાં જશ્નનો માહોલ
બીજી બાજુ ઓડિશામાં રાષ્ટ્રપતિ ચૂંટણીના પરિણામો પહેલા જ જીતની ઉજવણી શરૂ થઈ ગઈ છે. મયૂરભંજ જિલ્લામાં મુર્મૂના પૈતૃક ગાંમ રાયરંગપુરમાં રસ્તાઓ પર મુર્મૂના નામના પોસ્ટરો લાગેલા છે. જેમાં તેમના નામ પહેલા રાષ્ટ્રપતિ લખેલું છે. જ્યારે રાયરંગપુરના ગવર્મેન્ટ અપર પ્રાઈમરી સ્કૂલમાં ભણતા બાળકો અને સ્ટાફ પણ ખુબ ખુશ છે. દ્રૌપદી મુર્મૂએ આ જ શાળામાંથી પોતાનું પ્રાથમિક શિક્ષણ લીધુ હતું. સ્કૂલના સ્ટાફનું કહેવું છે કે તેમના માટે ખુબ જ ગર્વની વાત છે કે તેમના ત્યાંના એક વિદ્યાર્થી હવે દેશના રાષ્ટ્રપતિ બનવા જઈ રહ્યા છે. 

શાળાના ટીચર રહી ચૂકેલા બિશ્વેસ્વર મોહંતી કહે છે કે મને ખુબ જ ગર્વ મહેસૂસ થઈ રહ્યો છે કે તેઓ એક પ્રતિભાશાળી વિદ્યાર્થી હતા. મને યાદ છે કે જ્યારે મે એકવાર બધા બાળકોને પૂછ્યું હતું કે તેઓ મોટા થઈને શું બનવા માંગે છે ત્યારે બધા બાળકોએ અલગ અલગ વાત કરી હતી પરંતુ મુર્મૂએ કહ્યું હતું કે તેઓ મોટા થઈને લોકોની સેવા કરવા માંગે છે. આજે દ્રૌપદી મુર્મૂ પોતાનું વચન પાળ્યું છે. 

સંબંધીઓ પણ ખુશ
દ્રૌપદી મુર્મુના નવા રાષ્ટ્રપતિ બનવાની સંભાવનાઓથી તેમના ગામના લોકો અને સંબંધીઓમાં પણ ખુશીની લહેર છે. તેમના એક સંબંધી સરસ્વતીએ કહ્યું કે દ્રૌપદીએ સાબિત કર્યું છે કે મહિલાઓ બધુ કરી શકે છે. તેમના માટે કશું અશક્ય નથી. અન્ય સંબંધીઓ પણ આવા જ શબ્દો સાથે પોતાની ખુશી વ્યક્ત કરી રહ્યા છે. તેઓ મુર્મૂના રાષ્ટ્રપતિ બન્યા બાદ તેમના સ્વાગતની તૈયારીઓમાં લાગ્યા છે.