Antilia case: સચિન વાઝે પર ભરાયા પગલા, સસ્પેન્શન બાદ હવે પોલીસ સેવામાંથી બરતરફ

મુંબઈઃ મુકેશ અંબાણીના ઘર પર વિસ્ફોટક કાર મળવા અને કારોબારી મનસુખ હિરેનના મોતના મામલામાં આરોપી સચિન વાઝે પર મોટી કાર્યવાહી કરવામાં આવી છે. મુંબઈ પોલીસના પૂર્વ અધિકારી સચિન વાઝેને પહેલા સસ્પેન્ડ કરવામાં આવ્યા અને હવે પોલીસ સેવામાંથી બરતરફ કરી દેવામાં આવ્યા છે. મંગળવારે મુંબઈ પોલીસે જણાવ્યું કે, સચિન વાઝેને બરતરફ કરી દેવામાં આવ્યા છે. મહત્વનું છે કે સચિન વાઝેની 13 માર્ચે ધરપકડ કરવામાં આવી હતી. 

અંબાણીની સુરક્ષા ચૂક મામલાની તપાસ દરમિયાન એનઆઈએ ક્રાઇમ ઇન્ટેલિજન્સ યુનિટમાં વાઝેની સાથે કામ કરનાર સહાયક પોલીસ નિરીક્ષક રિયાઝુદ્દીન કાઝી અને પૂર્વ પોલીસકર્મી વિનાયક શિંદે તથા ક્રિકેટ સટોરિયા નરેશ ગોરની પણ ધરપકડ કરી ચુકી છે. કાઝીને પણ સસ્પેન્ડ કરવામાં આવ્યા છે. એન્ટીલિયા કેસ સિવાય સચિન વાઝે પર મનસુખ હિરેનના મોત મામલે પણ તપાસ થઈ રહી છે. 5 માર્ચે મુંબઈમાં મનસુખ હિરેનનો મૃતદેહ મળ્યો હતો. જાણવા મળી રહ્યું છે કે 25 ફેબ્રુઆરીએ અંબાણીના ઘરની પાસે જે કાર ઉભી રાખવામાં આવી હતી, તે મનસુખ હિરેનની હતી. ત્યારબાદ વાઝેની ધરપકડ કરવામાં આવી હતી.