મથુરા શાહી ઈદગાહનો સર્વે નહીં થાય, સુપ્રીમ કોર્ટે હાઈકોર્ટના આદેશ પર લગાવી રોક

મથુરા કૃષ્ણ જન્મભૂમિ શાહી ઈદગાહ મસ્જિદ વિવાદ મામલે સુપ્રીમ કોર્ટે મોટો હસ્તક્ષેપ કર્યો છે. હાલ શાહી ઈદગાહ-મસ્જિદમાં સર્વે થશે નહીં. સુપ્રીમ કોર્ટે અલાહાબાદ હાઈકોર્ટ દ્વારા કોર્ટ કમિશનરની નિયુક્તિના નિર્ણય પર રોક લગાવી છે. સુપ્રીમ કોર્ટે કહ્યું કે ટ્રાયલ કોર્ટમાં સુનાવણી ચાલુ રહેશે, પરંતુ કોર્ટ કમિશનરની નિયુક્તિ પર વચગાળાની રોક રહેશે. સુપ્રીમ કોર્ટ આ મામલે 23 જાન્યુઆરીના રોજ સુનાવણી કરશે. આયોગનો આદેશ આગામી સુનાવણી સુધી લાગુ કરી શકાશે નહીં. 

સુપ્રીમ કોર્ટે હિન્દુ પક્ષ પર સવાલ ઉઠાવતા કહ્યું કે તમારી અરજી ખુબ અસ્પષ્ટ છે. તમારે સ્પષ્ટ રીતે જણાવવું પડશે કે તમે શું ઈચ્છો છો. આ ઉપરાંત ટ્રાન્સફરનો મામલો પણ આ કોર્ટમાં પેન્ડિંગ છે. અમારે તેના ઉપર પણ નિર્ણય લેવાનો છે.