`ચેક એન્ડ મેટ`ના ખેલમાં આ રીતે ગોથું ખાઈ ગઈ શિવસેના, ટાંકણે કોંગ્રેસની ગુગલીથી ઉદ્ધવ ક્લિન બોલ્ડ?

નવી દિલ્હી: છેલ્લા 24 કલાકની અંદર મહારાષ્ટ્રના રાજકારણમાં અનેક રંગ જોવા મળ્યાં છે. આ રાજકારણના ખેલમાં કેન્દ્રમાં શિવસેના રહી. પરંતુ છેલ્લે તે હારી. આ સમગ્ર રાજનીતિક પરિદ્રષ્ટની સરખામણી મેચ સાથે કરીએ તો શિવસેનાએ આખો દિવસ શાનદાર બેટિંગ કરી પરંતુ જ્યારે મેચ જીતવાનો સમય આવ્યો તો કોંગ્રેસની ગુગલી પર ક્લિન બોલ્ડ થઈ ગઈ. રાજારણના વિદ્યાર્થી તરીકે આ ઘટનાને સમજીએ તો આ સમગ્ર ખેલમાં એ જ સમજાયું કે શિવસેનાએ બાળકબુદ્ધિ વાપરીને રાજકારણ ખેલ્યું. સરકાર બનાવવાને લઈને ઉદ્ધવ ઠાકરે એટલા તે ઉતાવળા થઈ ગયા કે તેઓ દેશની સૌથી જૂની રાજકીય પાર્ટી કોંગ્રેસ સામે પોતાનો ફજેતો કરાવી બેઠા. આ સાથે જ શિવસેના શરદ પવાર જેવા કાબિલ ની ચાલને પણ બરાબર ઓળખી શક્યા નહીં. આવો આપણે વિસ્તારથી સમજીએ કે શિવસેના ક્યાં પછડાટ ખાઈ ગઈ. 

ઉતાવળી જોવા મળી શિવસેના
રવિવારે સાંજે ભાજપે રાજ્યપાલ ભગતસિંહ કોશ્યારીને જણાવ્યું કે તેઓ એકલા હાથે મહારાષ્ટ્રમાં સરકાર બનાવવા માટે સક્ષમ નથી અને ત્યારબાદ રાજ્યપાલે બીજા નંબરની પાર્ટી શિવસેનાને આ તક આપી. રવિવારે મોડી સાંજે ખબર આવ્યાં કે શિવસેના અને એનસીપી વચ્ચે સરકાર બનાવવાને લઈને ડીલ થઈ ગઈ છે. જે મુજબ ઉદ્ધવ ઠાકરે  પોતે મુખ્યમંત્રી બનશે. જ્યારે શરદ પવારના ભત્રીજા અજીત પવારને ઉપ મુખ્યમંત્રી પદ મળી શકે છે અને જયંત પાટિલને ગૃહમંત્રી બનાવી શકે છે. આ સરકારને કોંગ્રેસ બહારથી સમર્થન આપી શકે છે અને તેના બદલે કોંગ્રેસને વિધાનસભા અધ્યક્ષનું પદ મળશે. આ ખબરને વધુ સમર્થન શિવસેના સાંસદ સંજય રાઉત તરફથી મીડિયામાં આવેલા નિવેદનોથી મળ્યું. 

શિવસેનાના રાજ્યસભાના સાંસદ સંજય રાઉતે રવિવારે સાંજે કહ્યું કે પાર્ટી અધ્યક્ષ ઉદ્ધવ ઠાકરેએ કહ્યું છે કે મહારાષ્ટ્રમાં આગામી મુખ્યમંત્રી શિવસેનાનો બનશે. તેમણે  કહ્યું એટલે સમજી લેવું કે ગમે તે કિંમતે તે જ થશે. 

શિવસેનાએ સમજ્યા વિચાર્યા વગર મોદી સરકાર સાથે તોડ્યો સંબંધ 
શિવસેના તરફથી આવેલા નિવેદન તે સમયે સાવ વામણા સાબિત થયા જ્યારે સરકાર બનાવવાને લઈને સોમવારે વાતચીતનો દોર શરૂ થયો. બપોરે લગભગ એક વાગે શિવસેના પ્રમુખ ઉદ્ધવ ઠાકરે પોતે એનસીપી પ્રમુખ શરદ પવારને મળવા માટે મુંબઈની હોટલ તાજ લેન્ડ્સ એન્ડ પહોંચ્યા હતાં. મીડિયામાં એવા અહેવાલો આવ્યાં કે એનસીપી અને શિવસેના વચ્ચે ડીલ ફાઈનલ થઈ ગઈ છે. આ બધા વચ્ચે એનસીપી પ્રવક્તા ભુક્કલ નવાબે પ્રેસ કોન્ફરન્સમાં કહ્યું કે શિવસેના સાથે મળીને સરકાર બનવા તૈયાર છે પરંતુ તેના પર કોંગ્રેસની સહમતિ જરૂરી છે. નવાબના આ નિવેદનથી સંકેત મળી ગયો કે ડીલમાં હજુ પણ પેચ ફસાયેલો છે. 

જુઓ LIVE TV