હરિયાણાની 20 સીટો પર ફરીથી ચૂંટણી કરાવો, સુપ્રીમમાં પહોંચ્યો મામલો, જાણો શું આવ્યો ચૂકાદો

Supreme Court On Haryana Election:હરિયાણામાં તાજેતરમાં યોજાયેલી વિધાનસભા ચૂંટણીમાં ભાજપે 48 બેઠકો જીતી છે. કોંગ્રેસને 37 બેઠકો મળી છે. હરિયાણામાં 20 બેઠકોની ફરી ચૂંટણીનો મામલો સુપ્રીમમાં પહોંચ્યો છે. જે મામલે સુનાવણી થઈ છે. જાણો સુપ્રીમે શું આપ્યો ચૂકાદો...

સુપ્રીમ કોર્ટે હરિયાણાની 20 વિધાનસભા બેઠકો પર ફરીથી ચૂંટણી કરાવવાની માંગ કરતી અરજીને ફગાવી દીધી છે. કોંગ્રેસ દ્વારા આ અરજી દાખલ કરવામાં આવી હતી જેમાં ઈવીએમને લઈને સવાલો ઉઠાવવામાં આવ્યા હતા. CJI એ કડક સ્વરમાં કહ્યું, કેવા પ્રકારની અરજીઓ દાખલ કરવામાં આવે છે?

અરજદારના વકીલે કહ્યું કે મતગણતરીનાં દિવસે ઘણા EVM મશીનોની બેટરી ઓછી ચાર્જ થઈ હતી. આ પહેલાં કોર્ટે હરિયાણામાં શપથ ગ્રહણ બંધ કરવાની માંગ કરવા માટે આ જ અરજદારને ઠપકો આપ્યો હતો. કોર્ટે કહ્યું હતું કે આવી માંગ માટે દંડ વસૂલવો જોઈએ.

કોંગ્રેસનું પ્રતિનિધિમંડળ ECI અધિકારીઓને મળ્યું હતું
હરિયાણા વિધાનસભા ચૂંટણીના પરિણામો જાહેર થયા પછી, કોંગ્રેસના વરિષ્ઠ નેતાઓનું એક પ્રતિનિધિમંડળ દિલ્હીમાં ચૂંટણી પંચના અધિકારીઓને મળ્યું હતું અને ચૂંટણી પરિણામો સામે વાંધો ઉઠાવ્યો હતો. કોંગ્રેસના પ્રતિનિધિમંડળમાં કેસી વેણુગોપાલ, જયરામ રમેશ, પવન ખેડા અને અજય માકન જેવા વરિષ્ઠ નેતાઓ સામેલ હતા.

ભાજપે 48 બેઠકો જીતી છે
તમને જણાવી દઈએ કે હરિયાણા વિધાનસભા ચૂંટણીમાં ભાજપે 90માંથી 48 સીટો પર જંગી બહુમતી મેળવી છે.  દસ વર્ષથી સત્તામાં રહેલા ભાજપ સામે સત્તા વિરોધી લહેરનો લાભ લેવામાં નિષ્ફળ ગયેલી કોંગ્રેસ 37 બેઠકો જીતવામાં સફળ રહી છે. આ સિવાય INLDને 2 બેઠકો મળી છે. ઉપરાંત અપક્ષ ઉમેદવારોનો પણ વિજય થયો છે. જોકે તેમણે હાઈકમાન્ડને મળ્યા બાદ ભાજપને સમર્થન જાહેર કર્યું છે.