મમતા બેનર્જીને મોટો ઝટકો, કોલકાતા HC એ 5 લાખનો દંડ ફટકાર્યો, જાણો શું છે મામલો

કોલકાતા: પશ્ચિમ બંગાળના મુખ્યમંત્રી મમતા બેનર્જીને કોલકાતા હાઈકોર્ટે મોટો ઝટકો આપ્યો છે. કોર્ટે જજ પર સવાલ ઉઠાવવાના મામલે 5 લાખ રૂપિયાનો દંડ ફટકાર્યો છે. આ કેસની સુનાવણી કરી રહેલા જસ્ટિસ કૌશિક ચંદા (Justice Kaushik Chanda) એ પોતાના પર લાગેલા આરોપો નિરાધાર જણાતા પાંચ લાખ રૂપિયાનો દંડ ફટકાર્યો છે. આ પૈસાનો ઉપયોગ કોવિડ-19 પીડિત પરિવારોના સભ્યોની મદદ માટે કરાશે. અત્રે જણાવવાનું કે મમતા બેનર્જીએ નંદીગ્રામમાં હાર બાદ કોર્ટમાં દાખલ કરેલી અરજીની સુનાવણી માટે જજ બદલવાની માગણી કરી હતી. મમતાએ જસ્ટિસ ચંદા પર ભાજપ સાથે સંબંધનો આરોપ લગાવ્યો હતો. 

કોર્ટની છબી ખરડવાનો આરોપ
કોર્ટે આ મામલે ટિપ્પણી કરતા એમ પણ કહ્યું કે મમતા બેનર્જીએ ન્યાયપાલિકાની છબી ખરડવાની કોશિશ કરી છે. આ અગાઉ અરજી દાખલ કરતી વખતે મમતા તરફથી કહેવાયું હતું કે જસ્ટિસ ચંદાનો કથિત ફોટો સામે આવ્યો છે જેમાં તેઓ ભાજપના નેતાઓ સાથે જોવા મળી રહ્યા છે. આવામાં તેમણે  કેસથી હટી જવું જોઈએ. 

શું છે મામલો
વાત જાણે એમ છે કે 2જી મેના રોજ 4 રાજ્યો અને એક કેન્દ્રશાસિત પ્રદેશમાં થયેલી વિધાનસભા ચૂંટણીના પરિણામ આવ્યા હતા. બંગાળમાં ટીએમસીની જીત જરૂર થઈ પણ મમતા બેનર્જી નંદીગ્રામ બેઠક પર ભાજપના શુવેન્દુ અધિકારી સામે હારી ગયા. 1956 મતોથી હાર્યા બાદ મમતાએ ફેર મતગણતરીની માગણી કરી. જેને ચૂંટણી પંચે સ્વીકારી નહીં.