દેશના જવાનો સાથે અંબાણી પરિવારે પુત્ર આકાશના લગ્નની કરી ઉજવણી
મુંબઈમાં ખુલેલા ધીરૂભાઈ અંબાણી સ્ક્વેરની એક ઈવેન્ટમાં આર્મી, નેવી, મુંબઈ પોલીસ, અર્ધલશ્કરકી દળો અને રેલવે પ્રોટેક્શન ફોર્સના એક હજાર સભ્યો તેમના પરિવાર સાથે હાજર રહ્યા હતા. નીતા અંબાણી અને મુકેશ અંબાણીએ પોતાના દીકરાના લગ્નની ખુશીમાં દેશના જવાનોને સામેલ કરવા માટે આ વિશેષ કાર્યક્રમનું આયોજન કર્યું હતું.
નીતા અંબાણીએ આ દરમિયાન વાત કરતા જણાવ્યું કે, મને એ બાબતનો ખૂબ જ આનંદ અને ગર્વનો અનુભવ થઈ રહ્યો છે કે, અમારા દેશની સુરક્ષા કરતા સૈનિકો અમારી આ ઉજવણીમાં સામેલ થયા છે. આ અત્યંત ભાવુક કરી દેનારી ક્ષણો છે કે અમારા દેશના આ હીરો આજે આકાશ અને શ્લોકાને તેમના આશિર્વાદ આપવા આવ્યા છે.
આ પ્રસંગે મુંબઈના બીકેસીમાં ધીરૂભાઈ અંબાણી સ્ક્વેર ખુલ્લુ મુકાયું હતું. તેનું મુખ્ય આકર્ષણ એક વિશેષ મ્યુઝિકલ ફાઉન્ટેન શો રહ્યો જેને 'અનંત પ્રેમ' નામ અપાયું હતું. ધીરૂભાઈ અંબાણી સ્ક્વેર ખાતે થયેલા આ આયોજનનો કન્સેપ્ટ નીતા અંબાણી દ્વારા પ્રસ્તુત કરાયો હતો. જેમાં કૃષ્ણ રાસલીલા પણ રજૂ કરાઈ હતી.
અંબાણી પરિવારના પુત્ર આકાશ અંબાણીના લગ્ન હીરા વેપારી રસેલ મહેતાની દીકરી શ્લોકા સાથે 9 માર્ચના રોજ સંપન્ન થયા હતા. આ લગ્નમાં દેશ-વિદેશની જાણીતી હસ્તીઓએ વર-વધુને આશિર્વાદ આપ્યા હતા.
ઉલ્લેખનીય છે કે, આકાશ-શ્લોકાના લગ્નસમારોહમાં રજનીકાંત, અમિતાભ બચ્ચન, આમિર ખાન, શાહરૂખ ખાન, રણબીર કપૂર, પ્રિયંકા ચોપડા, વિદ્યા બાલન, અભિશેષ બચ્ચન સહિત બોલિવૂડના અનેક સુપરસ્ટાર હાજર રહ્યા હતા. વિદેશના અનેક નેતાઓ પણ તેમાં ભાગ લેવા આવ્યા હતા.