IND-PAK મેચ પહેલાં શુભમન ગિલને મળી ખુશખબરી, ICC એ આપ્યું મોટું એલાન

અમદાવાદના નરેન્દ્ર મોદી સ્ટેડિયમમાં 14 ઓક્ટોબરે રમાનારી ભારત અને પાકિસ્તાન વચ્ચેની મેચ પહેલા શુભમન ગિલને લઈને મોટા સમાચાર છે. ગિલ હજુ સુધી વનડે વર્લ્ડ કપમાં એકપણ મેચ રમી શક્યો નથી. ડેન્ગ્યુના કારણે તે ટીમની બહાર રહ્યો હતો.

ICCએ શુભમન ગિલને સપ્ટેમ્બર માટે ICC પ્લેયર ઓફ ધ મન્થ તરીકે પસંદ કર્યો છે. તેના સિવાય ભારતના યુવા ઝડપી બોલર મોહમ્મદ સિરાજ અને ઈંગ્લેન્ડના ડેવિડ મલાનને આ એવોર્ડ માટે નોમિનેટ કરવામાં આવ્યા હતા.

ICCએ કહ્યું છે કે ભારતનો ઉભરતો સ્ટાર શુભમન ગિલ વર્લ્ડ કપ પહેલા અનેક ODI મેચોમાં તેના જોરદાર પ્રદર્શન બાદ સપ્ટેમ્બર 2023 માટે ICC પ્લેયર ઓફ ધ મંથ છે.

શુભમન ગિલે સપ્ટેમ્બરમાં ODIમાં લગભગ 80ની એવરેજથી 480 રન બનાવ્યા હતા. આ ભારતીય બેટ્સમેને એશિયા કપ (2023)માં 75.5ની એવરેજથી 302 રન ઉમેર્યા હતા. તમને જણાવી દઈએ કે ભારતે ફાઇનલમાં શ્રીલંકાને 10 વિકેટથી હરાવીને એશિયા કપ જીત્યો હતો.

ત્યારબાદ ઓસ્ટ્રેલિયા સામેની વનડે શ્રેણીમાં પણ શુભમનનું શાનદાર ફોર્મ ચાલુ રહ્યું. તેણે ઓસ્ટ્રેલિયા સામે 2 ઇનિંગ્સમાં 178 રન બનાવ્યા હતા. તે સપ્ટેમ્બરમાં 8 ઇનિંગ્સમાં માત્ર 2 વખત 50થી ઓછા રનમાં આઉટ થયો હતો.

24 વર્ષીય શુભમન ગિલ અત્યાર સુધીમાં 35 વન-ડે ઈન્ટરનેશનલ મેચ રમી ચૂક્યો છે અને તેણે 66.1ની એવરેજ અને 102.84ની સ્ટ્રાઈક રેટથી 1917 રન બનાવ્યા છે. હાલમાં તે ICC ODI રેન્કિંગમાં પાકિસ્તાનના કેપ્ટન બાબર આઝમ પછી નંબર-2 પર છે.