Fingerprint Island: આકાશમાંથી ફિંગરપ્રિન્ટ જેવો દેખાય છે આ ટાપુ, જાણો ક્યાં છે આ આઇલેન્ડ
યુરોપિયન દેશ ક્રોએશિયાના દરિયાકાંઠાની નજીક એક નાનો ટાપુ છે જેને બાલ્જેનાક અથવા બાવલજેનાક કહેવામાં આવે છે. જો હેલિકોપ્ટર કે ડ્રોનની મદદથી જોવામાં આવે તો તે બિલકુલ માનવ ફિંગરપ્રિન્ટ જેવું લાગે છે.
બાલ્ઝેનાક આઇલેન્ડ એડ્રિયાટિક સમુદ્રમાં સ્થિત સિબેનિક દ્વીપસમૂહનો એક ભાગ છે. જેનો આકાર અંડાકાર છે જે અંગૂઠાની છાપ જેવો દેખાય છે, તેમાં સુકા પથ્થરની દિવાલોની શ્રેણી છે જે તેને ફિંગરપ્રિન્ટનો આકાર આપે છે. આ જ કારણ છે કે તેને ક્યારેક ફિંગરપ્રિન્ટ આઇલેન્ડ કહેવામાં આવે છે.
ટાપુનો અંડાકાર આકાર કુદરતી છે, પરંતુ ફિંગરપ્રિન્ટ જેવો નજારો આવે છે કારણ કે નજીકના ટાપુ કપરીજેના રહેવાસીઓએ તેમના પાકને જોરદાર પવનથી બચાવવા માટે અહીં મજબૂત દિવાલો બનાવી હતી, જે ટાપુને ખેતી માટે યોગ્ય બનાવે છે. આ જ કારણ છે કે જ્યારે ઉપરથી જોવામાં આવે તો તે ફિંગરપ્રિન્ટ જેવું લાગે છે. જોકે આવી દિવાલો યુરોપના ઘણા દેશોમાં બનાવવામાં આવી છે.
આ ટાપુનું સરફેસ એરિયા માત્ર 0.14 ચોરસ કિલોમીટર છે અને તેનો દરિયાકિનારો માત્ર 1.43 કિલોમીટર છે, એટલે કે તમે પગપાળા આ ટાપુની પરિક્રમા કરી શકો છો. રસપ્રદ વાત એ છે કે અહીં કોઈ માણસ રહેતો નથી.
આ ટાપુ પર્યટન અને ટ્રાવેલ ફ્રીક્સને આકર્ષે છે, તેનો એરિયલ વ્યૂ એટલો અનોખો છે કે ક્રોએશિયા સરકારે યુનેસ્કોને તેને વર્લ્ડ હેરિટેજ સાઇટનો દરજ્જો આપવા વિનંતી કરી છે.