ચેન્નઈની સફળતાનું રાઝ જણાવી દઈશ તો મને હરાજીમાં કોઈ ખરીદશે નહીં: ધોની

ચેન્નઈઃ ચેન્નઈ સુપર કિંગ્સના કેપ્ટન મહેન્દ્ર સિંહ ધોનીએ કહ્યું કે, જો તે ટીમની સફળતાનું રાઝ ખોલી દેશે તો આઈપીએલની હરાજીમાં તેને કોણ ખરીદશે. સનરાઇઝર્સ હૈદરાબાદ પર છ વિકેટથી વિજય પ્રાપ્ત કર્યા બાદ ધોનીએ કહ્યું, ચેન્નઈની સફળતાનો મંત્ર હું જણાવી દઈશ તો મને હરાજીમાં ખરીદશે નહીં. આ રાઝની વાત છે. 

ધોનીની આગેવાનીમાં ચેન્નઈની ટીમ 2010, 2011 અને 2018માં ચેમ્પિયન બની અને 2016, 2017ને છોડીને દરેક સિઝનમાં પ્લેઓફમાં પહોંચી છે. આ બે વર્ષ ટીમ પર પ્રતિબંધ હતો. 

ધોનીએ કહ્યું, 'દર્શકો અને ફ્રેન્ચાઈઝીનું સમર્થન મહત્વનું છે.' સહયોગી સ્ટાફને ઘણો શ્રેય જાય છે જે ટીમ અને ખેલાડીઓ માટે સારો માહોલ બનાવે છે. તેમણે કહ્યું, આ સિવાય હું નિવૃતી લેવા સુધી વધુ કંઈ ન જણાવી શકું. 

તેણે કહ્યું, આ સ્તર પર આવી સમસ્યાઓ આવતી રહે છે. તમે સંપૂર્ણ પણે ફિટ થવાની રાહ જોશો તો બે મેચો વચ્ચે પાંચ વર્ષનું અંતર આવી જશે.