ટીમ ઈન્ડિયાનો એવો ખેલાડી જેના દાદા, પપ્પા, કાકા, મોટાભાઈ...બધા જ ક્રિકેટર હતા! સૌ કોઈ કરે છે આ છોકરાના વખાણ!

નવી દિલ્લીઃ ભારતના અંડર-19 ક્રિકેટરો હાલમાં વેસ્ટ ઈન્ડિઝમાં વર્લ્ડ કપ રમી રહ્યા છે. ટીમ ઈન્ડિયાએ ક્વાર્ટર ફાઈનલમાં જગ્યા બનાવી લીધી છે અને બાંગ્લાદેશનો સામનો કરવાનો છે.સૌની નજર ટીમ ઈન્ડિયાના ઓપનર હરનૂર સિંહ પર છે. તેણે પોતાની બેટિંગથી પહેલા અંડર 19 એશિયા કપમાં બધાને પ્રભાવિત કર્યા હતા અને હવે વર્લ્ડ કપમાં પણ તેનું બેટ ગર્જના કરી રહ્યું છે.

હરનૂરનો આખો પરિવાર ક્રિકેટર છે-
હરનૂર સિંહનો જન્મ પંજાબના જલંધરમાં થયો હતો, જ્યાં રહેતા હરભજન સિંહ પણ ટીમ ઈન્ડિયાના સ્ટાર ક્રિકેટર રહી ચૂક્યા છે. હરનૂરના દાદા રાજિન્દર સિંહ પંજાબ ક્રિકેટ એસોસિએશનના સંયુક્ત સચિવ રહી ચૂક્યા છે. હરનૂરના પિતા અને કાકા પણ પંજાબ તરફથી રમી ચૂક્યા છે. તેના કાકા પણ કોચ છે. તેનો મોટો ભાઈ પણ પંજાબ માટે અંડર-19 ક્રિકેટ રમી ચુક્યો છે

હરનૂર સિંહે એશિયા કપમાં સૌથી વધુ રન બનાવ્યા હતા
ગયા વર્ષે ડિસેમ્બરમાં રમાયેલી અંડર-18 એશિયા કપ ટુર્નામેન્ટમાં હરનૂર સિંહે સૌથી વધુ રન બનાવ્યા હતા. પાંચ મેચની પાંચ ઇનિંગ્સમાં તેણે 50.20ની એવરેજથી 251 રન બનાવ્યા હતા.

આ દરમિયાન તેણે એક સદી અને એક અડધી સદી ફટકારી હતી. તેણે UAE સામે 130 બોલમાં 120 રન બનાવ્યા હતા. પાકિસ્તાન સામે 59 બોલમાં 46 રન, અફઘાનિસ્તાન સામે 65 બોલમાં 74 રન બનાવ્યા હતા. બાંગ્લાદેશ સામેની સેમીફાઈનલમાં તેના બેટથી 29 બોલમાં 15 રન થયા હતા.

હાલમાં, હરનૂર સિંહ વેસ્ટ ઈન્ડિઝમાં રમાઈ રહેલા વર્લ્ડ કપમાં અંગક્રિશ રઘુવંશી સાથે ઓપનિંગ કરે છે. ઓપનરોની આ જોડી વર્લ્ડ કપમાં સૌથી વધુ પસંદ કરવામાં આવી રહી છે. હરનૂર અંડર-19 વર્લ્ડ કપની પ્રથમ મેચમાં માત્ર 1 રન બનાવીને પેવેલિયન પરત ફર્યો હતો, પરંતુ આયર્લેન્ડ સામેની બીજી મેચમાં તેણે પોતાનો અસલી રંગ બતાવ્યો હતો અને 88 (101) રન બનાવ્યા હતા. હરનૂર સિંહે પોતે કહ્યું હતું કે તેઓ શુભમન ગિલને પોતાનો રોલ મોડલ માને છે અને તેમની પાસેથી ઘણું શીખે છે.