ઈંગ્લેન્ડનો કેપ્ટન રૂટ બીજીવાર પિતા બન્યો, સોશિયલ મીડિયા પર શેર કરી તસવીર

લંડનઃ ઈંગ્લેન્ડ ટેસ્ટ ક્રિકેટ ટીમનો નિયમિત કેપ્ટન જો રૂટ બીજીવાર પિતા બની ગયો છે. રૂટે બુધવારે સોશિયલ મીડિયા પર તેની જાણકારી આપી છે. તેણે ઈન્સ્ટાગ્રામ પર એક ફોટો પોસ્ટ કર્યો, જેમાં તે પોતાના બંન્ને બાળકોની સાથે જોવા મળી રહ્યો છે.

રૂટની પત્ની કેરી કોટ્રેલે 7 જુલાઈએ પુત્રીને જન્મ આપ્યો છે. આ બંન્નેને એક પુત્ર છે, જેની ઉંમર ત્રણ વર્ષ છે. રૂટે માર્ચ 2016માં પોતાની ગર્લફ્રેન્ડ કેરી સાથે સગાઈ કરી હતી. જાન્યુઆરી 2017માં તેમણે પ્રથમ સંતાનને જન્મ આપ્યો હતો. 

29 વર્ષીય રૂટ પિતા બનવાને કારણે વિન્ડીઝ સામે શરૂ થયેલી પ્રથમ ટેસ્ટ મેચમાં ન રમવાનો નિર્ણય લીધો હતો. રૂટની ગેરહાજરીમાં બેન સ્ટોક્સ પ્રથમ મેચમાં ટીમની આગેવાની કરી રહ્યો છે.

સ્ટોક્સે કહ્ય, જ્યારે મેં બ્લેઝરની સાથે પોતાનું ફોટો શૂટ પૂરુ કર્યું, ત્યારે મને મારા માટે સૌથી સારો સંદેશ મળ્યો. રૂટે મને સંદેશ મોકલ્યો, જેમાં લખ્યુ હતું, પોતાની રીતે રમો. 

રૂટની ગેરહાજરીમાં શરૂ થયેલી ટેસ્ટમાં વરસાદ પડ્યો હતો. ટોસમાં ત્રણ કલાકનો વિલંબ થયો હતો. વરસાદના વિઘ્નને કારણે દિવસ દરમિયાન માત્ર 17.4 ઓવરોની રમત શક્ય બની હતી.