ઈંગ્લેન્ડે વિદેશની ધરતી પર હાસિલ કરી 150મી ટેસ્ટ જીત, આફ્રિકાને ઈનિંગ અને 53 રને હરાવ્યું

નવી દિલ્હીઃ South Africa vs England 3rd Test: ઈંગ્લેન્ડની ટીમે યજમાન દક્ષિણ આફ્રિકાને 4 ટેસ્ટ મેચોની સિરીઝના ત્રીજા મુકાબલામાં ધરાશાયી કરી દીધું છે. ઈંગ્લિશ ટીમે પ્રોટિયાઝને પોર્ટ એલીઝાબેથમાં રમાયેલી ત્રીજી ટેસ્ટ મેચમાં ઈનિંગ અને 53 રનથી પરાજય આપીને શ્રેણીમાં 2-1થી લીડ મેળવી લીધી છે. ઈંગ્લેન્ડ તરફથી બેન સ્ટોક્સ અને ઓલી પોપે શાનદાર સદી ફટકારી હતી. 

એટલું જ નહીં ઈંગ્લેન્ડની ટીમની આ વિદેશની ધરતી પર 500મી ટેસ્ટ મેચ હતી, જેમાંથી તેણે 150મી ટેસ્ટ મેચમાં જીત હાસિલ કરી હતી. આ મુકાબલામાં ઈંગ્લેન્ડની ટીમના કેપ્ટન જો રૂટે ટોસ જીતીને પ્રથમ બેટિંગ કરતા 152 ઓવરમાં 9 વિકેટે 499 રન બનાવ્યા હતા. ઈંગ્લિશ ટીમ તરફથી એકવાર ફરી ઓલરાઉન્ડર બેન સ્ટોક્સે 120 રન બનાવ્યા તો યુવા ઓલી પોપે કરિયરની પ્રથમ ટેસ્ટ સદી ફટકારતા અણનમ 135 રન બનાવ્યા હતા.