ભારત-પાકિસ્તાનની મેચ જોવાનો ઉત્સાહ હોય તો આ રહી ટિકિટની તમામ માહિતી

ICC Cricket World Cup 2023 Tickets અતુલ તિવારી/અમદાવાદ : ભારતમાં 5 ઓક્ટોબરથી વર્લ્ડ કપ શરૂ થવાનું છે. આ માટે કાર્યક્રમ જાહેર થઈ ગયો છે. પરંતુ આ ગેમમાં અસલી મજા ભારત-પાકિસ્તાન મેચમાં આવશે. હાઈવોલ્ટેજ ડ્રામા જોવા મળશે. ક્રિકેટ રસિકોમાં સૌથી વધુ ઉત્સાહ તો ભારત પાકિસ્તાન મેચમાં જ જોવા મળશે. તેથી તેની ટિકિટની વિગતો પણ આવી ગઈ છે. ભારત પાકિસ્તાનની મેચની ટિકિટનો ભાવ બે હજારથી લઈને એક લાખ સુધી પહોંચવાની શક્યતા છે. 

ક્યારથી શરૂ થશે રજિસ્ટ્રેશન
ભારત - પાકિસ્તાન વર્લ્ડ કપ મેચની ટીકીટ 3 સપ્ટેમ્બરથી મળશે. ભારત પાકિસ્તાન મેચ સિવાય અન્ય મેચની ટીકીટ મળવાની શરૂઆત 25 ઓગસ્ટથી થશે, જેના માટે 15 ઓગસ્ટથી રજીસ્ટ્રેશન શરૂ થશે. ભારત - પાકિસ્તાન વર્લ્ડ કપ મેચની ટીકીટની કિંમત બે હજાર રૂપિયાથી શરૂ થવાની શક્યતા છે. પરંતું જુદા જુદા સ્ટેન્ડની ટીકીટ 2 હજારથી એક લાખ રૂપિયા સુધી રહેવાની શક્યતા છે. 

ભારત - પાકિસ્તાન મેચની 

• K, L, P, Q બ્લોકની ટીકીટ 2 હજાર રૂપિયા
• J, R ની 2500 રૂપિયા
• B, C, F, G ની 3500 રૂપિયા
• M, N ની 4 હજાર
• A, H ની 4500 રૂપિયા
• D, E ની 6 હજાર રૂપિયા

આ ઉપરાંત 

• સાઉથ પ્રીમિયમ ઇસ્ટ અને વેસ્ટની ટીકીટ 10 હજાર રૂપિયામાં મળે તેવી શક્યતા
• ક્લબ પ્રેસિડેન્ટ ગેલેરીની ટીકીટ 25 હજાર રૂપિયા તેમજ 30 હજાર રૂપિયામાં રહેશે
• પ્રીમિયમ સ્યૂટ અને રિલાયન્સ એન્ડ બોક્સની ટીકીટ 75 હજાર રૂપિયા રહેશે
• ભારત - પાકિસ્તાન મેચની પ્રેસિડેન્સીયલ સ્યૂટ લેવલ 4ની ટીકીટ 1 લાખ રૂપિયા રહેશે

ઈ-ટિકિટ નહિ ચાલે
14 ઓક્ટોબરના રોજ ભારત - પાકિસ્તાનની મેચ નરેન્દ્ર મોદી સ્ટેડિયમમાં રમાનાર છે. તો 5 ઓક્ટોબરથી શરૂ થનાર વર્લ્ડ કપનો સુધારા સાથે કાર્યક્રમ જાહેર થઈ ચૂક્યો છે. ભારત - પાકિસ્તાન મેચ સહિત અમદાવાદમાં કુલ 5 મેચ રમાવાની છે. વર્લ્ડ કપની મેચમાં ઇ ટીકીટ ચાલશે નહીં, ઓનલાઈન ટીકીટ ખરીદનારે બોક્સ ઓફિસથી જ ટીકીટ ખરીદવી પડશે. 

ભારત - પાકિસ્તાનની મેચની ટિકિટની કિંમત જેટલી જ કિંમત ફાઇનલ મેચ માટે રહેશે. વર્લ્ડ કપની ફાઇનલ મેચ 19 નવેમ્બરે અમદાવાદમાં જ રમાશે. આ સિવાય બાકીની ત્રણ મેચની ટિકિટની શરૂઆત 1 હજાર રૂપિયાથી લઈ 30 હજાર સુધી રહેશે. સાઉથ આફ્રિકા - બાંગ્લાદેશ મેચની ટીકીટ 500 રૂપિયામાં મળશે.