મુંબઈઃ બોલરોના શાનદાર પ્રદર્શનની મદદથી રાજસ્થાન રોયલ્સ (RR) એ અહીં રમાયેલી ઈન્ડિયન પ્રીમયિર લીગ (IPL 14) ની 18મી મેચમાં કોલકત્તા નાઇટ રાઇડર્સ (KKR) ને 6 વિકેટે પરાજય આપી સીઝનની બીજી જીત મેળવી છે. તો પાંચ મેચમાં કોલકત્તા નાઇટ રાઇડર્સનો આ સતત ચોથો પરાજય છે, અને ટીમ પોઈન્ટ ટેબલમાં છેલ્લા સ્થાને પહોંચી ગઈ છે. ટોસ હારીને પ્રથમ બેટિંગ કરવા ઉતરેલી કોલકત્તાએ 20 ઓવરમાં 9 વિકેટે 133 રન બનાવ્યા હતા. જેના જવાબમાં રાજસ્થાને 18.5 ઓવરમાં 134 રન બનાવી લક્ષણ હાસિલ કરી લીધો હતો. 


COMMERCIAL BREAK
SCROLL TO CONTINUE READING

જોસ બટલર ફરી ફ્લોપ
રાજસ્થાન રોયલ્સે આજે નવી ઓપનિંગ જોડી સાથે ઈનિંગની શરૂઆત કરી હતી. જોસ બટલર સાથે યશસ્વી જાયસવાલ ક્રિઝ પર આવ્યો હતો. પરંતુ ટીમને ચોથી ઓવરમાં પ્રથમ ઝટકો લાગ્યો હતો. જોસ બટલર (5) રન બનાવી વરૂણ ચક્રવર્તીનો શિકાર બન્યો હતો. ત્યારબાદ યશસ્વી (22)ને શિવમ માવીએ પેવેલિયન પરત મોકલી આપ્યો હતો. યશસ્વીએ 17 બોલમાં પાંચ ચોગ્ગા ફટકાર્યા હતા. રાજસ્થાને પાવરપ્લેમાં 2 વિકેટે 50 રન બનાવ્યા હતા. 


સંજૂ સેમસને સંભાળી ઈનિંગ
40 રન પર બે વિકેટ ગુમાવ્યા બાદ કેપ્ટન સંજૂ સેમસન અને શિવમ દુબેએ 45 રનની ભાગીદારી કરી હતી. શિવમ દુબે 18 બોલમાં બે ચોગ્ગા અને એક છગ્ગા સાથે 22 રન બનાવી વરૂણ ચક્રવર્તીનો શિકાર બન્યો હતો. ત્યારબાદ રાહુલ તેવતિયા 5 રન બનાવી પ્રસિદ્ધ કૃષ્ણાની ઓવરમાં આઉટ થયો હતો. સંજૂ સેમસન 41 બોલમાં 42 અને ડેવિડ મિલર 24 રન બનાવી અમનમ રહ્યાં હતા. 


કોલકત્તા નાઇટ રાઇડર્સ માટે ખરાબ રહ્યો પાવરપ્લે
ટોસ હારીને પ્રથમ બેટિંગ કરવા ઉતરેલી કોલકત્તા નાઇટ રાઇડર્સની શરૂઆત ખરાબ રહી હતી. શુભમન ગિલ અને નીતિશ રાણા પ્રથમ છ ઓવરનો ફાયદો ઉઠાવવામાં નિષ્ફળ રહ્યાં હતા. ટીમને છઠ્ઠી ઓવરમાં શુભમન ગિલ (11)ના રૂપમાં પ્રથમ ઝટકો લાગ્યો હતો. ગિલ 19 બોલમાં એક બાઉન્ડ્રી ફટકારી રનઆઉટ થયો હતો. પાવરપ્લેમાં કોલકત્તાનો સ્કોર 1 વિકેટે 25 રન હતો. 


45 રનના સ્કોર પર કેકેઆરને બીજો ઝટકો લાગ્યો હતો. નીતિશ રાણા (22) ચેતન સાકરિયાનો શિકાર બન્યો હતો. સુનીલ નરેન (6) ને ઉનડકટે  યશસ્વીના હાથે કેચ કરાવી ટીમને ત્રીજી સફળતા અપાવી હતી. કેપ્ટન ઇયોન મોર્ગન (0) રનઆઉટ થયો હતો. ટીમે 61 રનમાં ચાર વિકેટ ગુમાવી હતી. ત્યારબાદ રાહુલ ત્રિપાઠી (36) રન બનાવી મુસ્તફિઝુરનો શિકાર બન્યો હતો. ત્રિપાઠીએ 26 બોલનો સામનો કરતા બે છગ્ગા અને એક ચોગ્ગો ફટકાર્યો હતો. 


દિનેશ કાર્તિક 24 બોલમાં 4 ચોગ્ગા સાથે 25 રન બનાવી ક્રિસ મોરિસનો શિકાર બન્યો હતો. રસેલ (9)ને મોરિસે મિલરના હાથે કેચ કરાવી રાજસ્થાનને છઠ્ઠી સફળતા અપાવી હતી. પેટ કમિન્સ (10) અને શિવમ માવી (5)ને મોરિસે પેવેલિયન મોકલી આપ્યા હતા. 


ક્રિસ મોરિસની ચાર વિકેટ
રાજસ્થાન રોયલ્સ તરફથી ક્રિસ મોરિસે આજે શાનદાર બોલિંગ કરી હતી. તેણે 4 ઓવરમાં 23 રન આપી ચાર વિકેટ ઝડપી હતી. આ સિવાય ઉનડકટ, સાકરિયા અને મુસ્તફિઝુરને એક-એક સફળતા મળી હતી.