DC vs PBKS: પંજાબ કિંગ્સે દિલ્હી કેપિટલ્સને 31 રને હરાવ્યું, હરપ્રીત બરારે ઝડપી 4 વિકેટ
IPL 2023, Match 59, DC vs PBKS: પંજાબ કિંગ્સે દિલ્હી કેપિટલ્સને 31 રને પરાજય આપી પ્લેઓફની આશા જીવંત રાખી છે. તો દિલ્હીની ટીમ આઈપીએલ-2023માં પ્લેઓફની રેસમાંથી બહાર થનારી પ્રથમ ટીમ બની ગઈ છે.
નવી દિલ્હીઃ પંજાબ કિંગ્સે પ્લેઓફની આશા જીવંત રાખતા દિલ્હી કેપિટલ્સને 31 રને પરાજય આપી ટૂર્નામેન્ટમાં છઠ્ઠી જીત મેળવી છે. તો દિલ્હી કેપિટલ્સની ટીમ સત્તાવાર રીતે પ્લેઓફની રેસમાંથી બહાર થનારી પ્રથમ ટીમ બની ગઈ છે. 12 મેચમાં દિલ્હીની ટીમનો આઠમો પરાજય થયો છે. પ્રથમ બેટિંગ કરતા પંજાબ કિંગ્સે પ્રભસિમરનજીત સિંહની સદીની મદદથી 20 ઓવરમાં 7 વિકેટે 167 રન ફટકાર્યા હતા. જેના જવાબમાં દિલ્હીની ટીમ 20 ઓવરમાં 8 વિકેટે 138 રન બનાવી શકી હતી.
પ્રભસિમરનની શાનદાર સદી
પંજાબના યુવા ઓપનર પ્રભસિમરન સિંહે શાનદાર બેટિંગ કરતા સદી ફટકારી હતી. પ્રભસિમરને 65 બોલમાં 10 ચોગ્ગા અને 6 છગ્ગા સાથે 103 રન ફટકાર્યા હતા. આ સિવાય પંજાબના તમામ બેટર ફ્લોપ રહ્યાં હતા. પ્રભસિમરન બાદ સેમ કરને સૌથી વધુ 20 રન બનાવ્યા હતા. આ સિવાય શિખર ધવન 7, લિવિંગસ્ટોન 4, જીતેશ શર્મા 5, હરપ્રીત બરાહ 2, શાહરૂખ ખાન 2 રન બનાવી આઉટ થયા હતા. સિકંદર રઝાએ અણનમ 11 રનનું યોગદાન આપ્યું હતું.
સારી શરૂઆત બાદ દિલ્હીનો ધબડકો
લક્ષ્યનો પીછો કરવા ઉતરેલી દિલ્હી કેપિટલ્સની શરૂઆત ધમાકેદાર રહી હતી. ડેવિડ વોર્નર અને ફિલ સોલ્ટે પાવરપ્લેમાં 65 રન ફટકારી દીધા હતા. દિલ્હીને સાતમી ઓવરમાં પ્રથમ ઝટકો લાગ્યો હતો. સોલ્ટ 17 બોલમાં 21 રન બનાવી આઉટ થયો હતો. ત્યારબાદ દિલ્હીનો ધબડકો થયો હતો. મિચેલ માર્શ 3 રન બનાવી રાહુલ ચાહરનો શિકાર બન્યો હતો. રિલી રોસો 5, અક્ષર પટેલ 1, મનીષ પાંડે 0 અને અમન ખાન 16 રન બનાવી આઉટ થયા હતા.
પંજાબ કિંગ્સ તરફથી હરપ્રીત બરારે 4 ઓવરમાં 30 રન આપી ચાર વિકેટ લીધી હતી. આ સિવાય નાથન એલિસે 2 અને રાહુલ ચાહરે બે વિકેટ ઝડપી હતી.
લેટેસ્ટ ન્યૂઝથી અપડેટ રહેવા માટે અમારી Zee News App ડાઉનલોડ કરો, અમારી સાથે જોડાઓ : facebook | twitter | youtube