Rishabh Pant: દિલ્હી કેપિટલ્સની મોટી જાહેરાત, ચાલુ IPL એ ઋષભ પંતની ટીમમાં થઈ એન્ટ્રી!

IPL 2023 Rishabh Pant: આઈપીએલ 2023 શરૂ થઈ ગઈ છે. દિલ્હી કેપિટલ્સની પહેલી મેચ લખનઉ સુપર જાયન્ટ્સ સામે હતી. ટીમના નિયમિત કેપ્ટન ઋષભ પંતનો ગત વર્ષે કાર અકસ્માત થયો હતો. આ ઘટનાના કારણે ઋષભ આઈપીએલની આ વખતની સીઝનમાંથી બહાર થઈ ગયો અને હાલ ડેવિડ વોર્નલ દિલ્હીની કેપ્ટનશીપ સંભાળે છે. આ બધા વચ્ચે ઋષભ પંતના ચાહકો માટે મોટા ખુશખબર આવ્યા છે. તે દિલ્હી કેપિટલ્સની આગામી મેચ દરમિયાન ફેન્સ વચ્ચે મેદાન પર જોવા મળશે. 

ઋષભ પંતના ચાહકો માટે મોટા ખુશખબર
દિલ્હી કેપિટલ્સ પોાતની આગામી મેચ આવતી કાલે 4થી એપ્રિલે ગુજરાત ટાઈટન્સ સામે રમશે. આ મેચમાં ઋષભ  પંત પણ જોવા મળશે. જો કે ઋષભ પંત આ મેચ દરમિયાન સ્ટેડિયમમાં દિલ્હીને સપોર્ટ કરતો જોવા મળશે. ન્યૂઝ એજન્સીના રિપોર્ટ મુજબ દિલ્હી એન્ડ ડિસ્ટ્રિક્ટ ક્રિકેટ એસોસિએશને આ વાતની પુષ્ટિ પણ કરી છે કે ઋષભ પંત અરુણ જેટલી ક્રિકેટ સ્ટેડિયમમાં મેચ દરમિયાન હાજર રહેશે. 

અત્ર જણાવવાનું કે દિલ્હી અને લખનઉ વચ્ચે રમાયેલી પહેલી મેચ દરમિયાન ઋષભ પંતની હાજરીનો અહેસાસ કરાવવા માટે ટીમે ઋષભ પંતની 17 નંબરવાળી જર્સીને ડગઆઉટમાં લટકાવી હતી. આઈપીએલ 2023ની શરૂઆત પહેલા જ દિલ્હીની ટીમે સ્પષ્ટ કર્યું હતું કે પંતની જર્સી સમગ્ર સીઝન દરમિયાન તેમની સાથે રહેશે. બીજી બાજુ ટીમના કોચ રિકી પોન્ટિંગે કહ્યું હતું કે તેઓ ટીમનું મનોબળ વધારવા માટે ઋષભ પંતને સ્ટેડિયમમાં લાવવાની કોશિશ કરશે. ટીમના કોચિંગ સ્ટાફ અને ઓનર પણ પોતાના નિયમિત કેપ્ટનને મિસ કરી રહ્યા છે.