છુટાછેડાના સમાચાર વચ્ચે સાનિયા મિર્ઝા અને શોએબ મલિકે લીધો મોટો નિર્ણય, ફેન્સ કન્ફ્યૂઝ

નવી દિલ્હીઃ ટેનિસ ખેલાડી સાનિયા મિર્ઝા અને પાકિસ્તાની ક્રિકેટર શોએબ મલિક છેલ્લા કેટલાક દિવસથી છુટાછેડાના સમાચારોને લઈને સતત ચર્ચામાં છે. સાનિયાની એક પોસ્ટ બાદ આ પ્રકારની ચર્ચા શરૂ થઈ હતી. સમાચાર તો ત્યાં સુધી હતા કે બંને અલગ રહે છે અને માત્ર તેનું પેપરવર્ક રહી ગયું છે. પરંતુ બંનેમાંથી હજુ કોઈએ તેના પર કોઈ નિવેદન આપ્યું નથી. છુટાછેડાના સમાચારો વચ્ચે હવે સાનિયા અને શોએબે આવનારા નવા રિયાલિટી શોની જાહેરાત કરી દીધી છે, જેનું નામ ધ મિર્ઝા મલિક શો (The Mirza Malik Show) છે. આ જોઈને ફેન્સ કન્ફ્યૂઝ થઈ ગયા છે. યૂઝર્સ તેના છુટાછેડાના સમાચારોને પબ્લિસિટી સ્ટંટ જણાવી રહ્યાં છે. 

ઓટીટી પ્લેટફોર્મે શેર કર્યું પોસ્ટર
શનિવારની રાત્રે ઓટીટી પ્લેટફોર્મ ઉર્દૂફ્લિક્સે ઈન્સ્ટાગ્રામ પર એક પોસ્ટ શેર કરી નવા શોની જાણકારી આપી છે. આ શોનું નામ 'ધ મિર્ઝા મલિક શો' છે. શોનું એક પોસ્ટર રિલીઝ કરવામાં આવ્યું છે, જેના પર સાનિયા અને શોએબનો ફોટો છે. બંને સાથે પોઝ આપી રહ્યાં છે. પોસ્ટરના બેકગ્રાઉન્ડમાં બુર્ઝ ખલીફા જોવા મળી રહ્યું છે. ઉલ્લેખનીય છે કે કપલ દુબઈમાં રહે છે. તેની સાથે કેપ્શનમાં લખ્યું છે, ધ મિર્ઝા મલિક શો જલદી માત્ર ઉર્દૂફ્લિક્સ પર.